"Errotik" aldatu nahi du Abotsanitzek udalaren hizkuntza politika
Udalaren euskararen ordenantza betearazi behar dela dio alderdiak, eta Euskara Biziberritzeko Plan Nagusia garatzeko konpromisoa adierazi du.
Abotsanitzen ordezkaritza 21. Korrikan. Abotsanitzek “errotik” aldatu nahi du Hondarribiko Udalaren hizkuntza politika. Euskararen erabileran jarri du fokua alderdiak, “jakina da euskaraz dakitenen artean oso gutxi direla eguneroko bizitzan gure hizkuntza erabiltzen dutenak”. Eta erabilera areagotzeko, udalak “asko” egin dezakeela uste du.
Erabileran eragiteko, hasteko, udalaren Euskararen Ordenantza bete egin behar dela azaldu du Abotsanitzek. Eta Euskara Biziberritzeko Plan Nagusia garatzeko konpromisoa agindu du, “aurreko lau urteetan bezala, etengabeko harremanetan jarraituko dugu herri eragile guztiekin, euskara bultzatzeko ekimen guztiak babestuz”.
Soziolinguistika Klusterrak Hondarribian egindako euskararen kaleko erabileraren azterketaren arabera, hizkuntzaren erabilera %24.6koa da; herrian euskaraz dakitenen kopurua, berriz, %60koa: “Kezka handiz ikusten du Abotsanitzek euskarak Hondarribian duen osasuna”.
