Erraldoien hiriburu izango da Irun
Bidasoako Erraldoiak konpartsaren 30 urteak ospatzeko jardunaldi solidarioa antolatu dute, Atzegi eta Aurreratu elkarteen alde. 100dik gora erraldoi bilduko dituzte.
Gaur aurkeztu dute jardunaldi solidarioa, kultura saileko ordezkari Juncal Eizaguirrek, Bidasoa Erraldoiak-eko, Atzegiko eta Aurreratuko kideek. 30. urteurrena ospatzeko Bidasoako Erraldoiak konpartsak egun osoko ekitaldi berezia antolatu du. Jardunaldi solidarioa egingo dute datorren ekainaren 8an, Atzegi eta Aurreratu elkarteen alde.
Estatu mailatik iritsitako 100 erraldoi baino gehiago bilduko dira, tartean Bidasoako Erraldoiak-en hiru konpartsak. 10:00etan ekingo diote desfile bereziari Dunboa ingurutik. Ibilbidean zehar, Nafarroa etorbidea, Colon pasealekua, Zabaltza plaza, Foru kalea eta San Juan plaza zeharkatuko dituzte, besteak beste. Ibilbidea amaitzean, Santiagoko Euskal Jai pilotalekuan bazkaria egingo dute, nola ez, erraldoia.
