II. Errepublikaren 88. urteurrena ospatuko dute irundarrek
12:30ean Martxa Errepublikanoa irtengo da Zabaltza plazatik. Ondoren, San Juan plazan ekitaldia eta bazkaria egingo dute.
Datorren igandean (hilak 14) 88 urte beteko dira II. Errepublika aldarrikatu zenetik, eta aurten ere Irungo bizilagunak kalera aterako dira ospatzera; Nicolas Guerendiain Irungo Errepublikarrak Taldeko kideek egun osoko egitaraua antolatu dute.
12:30ean, Martxa Errepublikanoa irtengo da Zabaltza plazatik (Errepublikanoen antzinako zentroa). Irungo kaleak zeharkatu ostean, San Juan plazan amaituko dute mobilizazioa. Bertan, txalapartak harrera egingo die manifestariei. Ondoren, komunikatu bat irakurriko dute, eta dantzariek aurreskua eskainiko dute. Amaitzeko, bandera errepublikanoa jasoko dute, Riegoren ereserkiaz lagunduta. Jarraian, herri bazkaria egingo dutela jakinarazi dute antolatzaileek.
Herritar guztiei luzatu diete etxeko balkoietan bandera errepublikanoak zintzilikatzeko deialdia, baita ere ekitaldi guztietan parte hartzekoa ere.
