"G7aren eta faxismo uholdearen aurrean", kaleak okupatuko ditu Jaion!-ek
Datorren larunbatean (hilak 13), Lakaxita gaztetxearen urteurrena ospatuko dute irundarrek. Egun osoko egitaraua prestatu dute.
Iazko Jaion! jaialdian HITZAk bildu zuen irudia. Lakaxitaren urteurrena ospatzeko unea iritsi da. Jaion! jaialdia antolatu dute datorren larunbaterako (hilak 13), hiriko kaleetan zehar zein Lakaxita gaztetxean. Datorren udan Biarritzen egingo duten “G7-aren eta faxismo uholdearen aurrean”, kaleak okupatzeko deia egin dute.
17:30ean emango diote hasiera jaialdiari, Moskun, Ni Yuta Ni Tuya taldeak kamioi ibiltarian eskainiko duen kontzertuarekin. Lakaxitarainoko ibilbidea kolorez eta biziz beteko du taldeak.
19:30ean berriz, Lakaxitako kontzertu sortari ekingo diote. Bertan, Penadas por la Ley, rukul,a, Optika eta Left Hook taldeak musika emanaldia eskainiko dute. 00:30tatik aurrera, DJ Psilocibina, Lola La Frigida eta DJ X-ek gaua alaituko dute.
Era berean, bertako produktu ekologikoz osatutako afari beganoa eskainiko dutela jakinarazi dute antolatzaileek. “Errealitate gris honetan kaleak kolorez betetzeko mozorrotuta etortzeko gonbita luzatzen dizuegu Gora okupazioa! Gora Lakaxita! Gora Gune Feministak!”, gehitu dute Lakaxitako kideek.
