Kataluniako herriari babesa adierazteko manifestazioa egingo dute Irunen
Manifestazioa ostiralean da, 19:30ean eta San Juan plazatik abiatuta. Gure Esku Dago-k herritarrei dei egin die parte har dezaten.
Larunbatean aurkeztu zuten manifestazioa. Kataluniako herriari babesa adierazteko, eta aldi berean, bertako “buruzagi sozial eta politiko subiranisten kontra epaiketa geldiarazi eta preso politikoak aska ditzatela eskatzeko”, manifestaziora deitu ditu Irungo Gure Esku Dago-k herritarrak. Mobilizazioa hilaren 12an (ostirala) da, 19:30ean San Juan plazatik abiatuta. Zabaltza plazan bukatuko da martxa, ekitaldi batekin. Larunbatean agerraldia egin zuten manifestazioa aurkezteko.
Gure Esku Dago-ren (GED) arabera, Kataluniako buruzagien kontra Madrilen egiten ari diren epaiketa eskubide urraketa da, “beraien eskubideen urraketekin gure eskubideak ere urratzen ari dira. Gu ere epaituak izaten ari gara. Galdeketa demokratiko bat epaitu eta zigortu nahi dute. Finean, herrien autodeterminazio eskubidea ukatu nahi dute”.
Hala, haien espetxeratzea “bidegabea” dela esateaz gain, elkarrizketa eta negoziazio bideak jorratu behar direla uste du GEDek, “herritarren borondatearekiko begirunean eta balio demokratikoetan oinarritutako konponbide politikoa posible izan dadin”.
Irungo GEDek herritar guztiei dei egin die manifestazioan parte har dezaten. Taldetik jakinarazi dute hiriko eragile politiko. sindikal eta sozial askorekin harremana egin dutela martxara atxiki daitezen: “Badakigu iniziatiba honen helburuekin herri honen gehiengoak bat egiten duela”.
