Martin Villa ministro ohia 'persona non grata' izendatu du Irunek
Irungo udalbatzak aho batez 'persona non grata' izendatu du, eta Kepa Ordoki elkartetik eta Josu Zabalaren senideen aldetik haren krimenak ikertzea eskatu dute.
Kepa Ordoki Memoria Historikoa Bidasoan elkarteak jakinarazi berri duenez, gaurtik ez da ongi etorria izango Rodolfo Martin Villa ministro ohia Irunen. Irungo udalbatzak aho batez persona non grata izendatu du, eta elkartetik eta Josu Zabalaren senideen aldetik haren krimenak ikertzea eskatu dute.
Adolfo Suarezen ministro garaia gogoratu dute elkarteko kideek, Josu Zabala gaztearen erailketa bereziki: “Hondarribian izan zen amnistiaren aldeko manifestazio batean Guardia Zibilak erail zuen 1976ko irailaren 8an. Krimen hau, hain zuzen ere, Martin Villa Gobernazio Ministroa izendatu eta denbora gutxira gertaturikoa izan zen”. Hala, Zabalaren kasua eta oraindik ebatzi gabe dauden guztiak ikertzea eskatu dute Frankismoaren krimenen aurkako Euskal Plataformak, Kepa Ordoki elkarteak eta Josu Zabalaren senideek.
Udalbatzak adostu du erabakia Justizia Ministerio espainiarrari, Auzitegi Nazionalaren buruari, Auzitegi Gorenaren buruari, Estatuko Fiskaltza Nagusiari eta Argentinako Errepublikaren Krimen gaietarako eta zentzategi federaleko 1. Epaitegi Nazionalari helaraztea.
