San Martzial-Txingudi kirol instalazioek oinezkoentzako sarbide berria izango dute
Iaz udalak bertan igerileku berria ireki zuen, eta asmoa irundarrei bertara eta padel zein tenis instalazioetara sarrera erraztea da.
Dagoeneko lehen lanak egiten hasi dira. Irungo Udalak jakinarazi berri duenez, martxan dira San Martzial-Txingudi kirol instalazioetara oinez joateko sarbide berriaren lanak. Iaz udalak bertan igerileku berria ireki zuen, eta asmoa irundarrei bertara eta padel zein tenis instalazioetara sarrera erraztea da.
San Martzial igoeran espaloia egingo dute (eskuineko aldean), eta espaloi berri horrek hilerria eta kirol instalazioak elkartuko ditu. Bide guztian zehar argiztapen berria jarriko dutela jakinarazi dute. Behin espaloia eraikita, instalazioen sarreratik zebrabideraino ere espaloia egokituko dute.
Era berean, kirol instalazioen hornidura eta saneamendu lanak ere egiteko asmoa adierazi dute udaleko Mugikortasun, Bide Publiko eta Obren sailetik. Obretarako udalak 310.961,76 euroko aurrekontua du, eta proiektua hiru hilabeteko epean amaitzea aurreikusi dute.
