Dena prest aurten ere hiria gelditzeko
Bidasoko Mugimendu Feministaz gain, udalak eta hiriko zenbait elkarte feministek ere mobilizazioak iragarri dituzte biharko.
Badator martxoaren 8a, eta iazko mobilizazio historikoak errepikatzeko hiriko emakumeek dagoeneko dena prest dute. Ekitaldi eta mobilizazio ugari egingo dituzte bihar Irunen, goiz zein arratsaldez. Bidasoko Mugimendu Feministaz gain, udalak eta hiriko zenbait elkarte feministek ere mobilizazioak iragarri dituzte.
Biharko aldarrikapen egunaren harira, udalbatzako talde politiko guztiek onartutako adierazpen instituzionala aurkeztu dute gaur. Gainera, bihar udaletxeko fatxada kolore morez apainduko dutela jakinarazi dute, eta balkoian kolore bereko begizta zintzilikatuko dutela.
Bidasoko Mugimendu Feministak greba egiteko modu asko izango direla gogoratu du. Herri eta hirietako mobilizazioetara joatea; zaintza lanari uztea eta hori irudikatzeko amantalak balkoietan eskegitzea; eskualde edo arloan greba antolatzea eta zabaltzea eta ez kontsumitzera deitu dute, normaltasunarekin apurtu eta dena itxita egotea baitute helburu.
Ondorengoa da biharko egitaraua (alboan antolatzailea):
- 11:45: ‘Egunero izan beharko luke martxoak 8’ lelopean elkarretaratzea, San Juan plazan (Berdintasunerako batzordea).
- 12:00: Manifestazioa San Juan plazatik (Bidasoko Mugimendu Feminista).
- 14:00: Kontsumoari planto egiteko bazkari kolektiboa San Juan plazan (Bidasoko Mugimendu Feminista).
- 14:00: Ahizpatasun bazkaria, Argoiak elkartearen egoitzan (Argoiak).
- 17:00: Martxa feminista Zabaltza plazatik abiatuko da. Hondarribira bideratuko dira, 19:00etako eskualdeko manifestaziora (Bidasoko Mugimendu Feminista).