Bost izen berri Jose Antonio Santanoren zerrendan
Berritasunak izango ditu 2019ko udal hauteskundeetarako PSE-EEk aurkeztuko duen zerrendak.
![](https://bidasoa.hitza.eus/site/files/2019/03/imgp4584.jpg)
Jose Antonio Santano alkatea 13 kideko zerrendarekin aurkeztuko da alkatetzara. Gaur jakinarazi duenez, maiatzeko hauteskundeetarako aurkeztuko duen zerrendak berritasunak izango ditu; bost izen berri daude. Alkateak hautagaitza errepikatuko zuela jakinarazi zuenetik, PSE-EEko kideak lanean ibili direla diote, “hurrengo udal hauteskundeetako erronkan lagunduko duen emakume eta gizon taldea osatzeko”.
Zerrenda berria “parekidea eta kremailerakoa” izango dela nabarmendu du alkateak, berritasuna eta esperientzia elkartuko dituela. Oso pozik azaldu da Santano osatutako taldearekin: “zaletasuna partekatzen duten irundarrez osatutako taldea da; bere hiriaz harro dauden irundarrak dira, trebakuntza bikaina dutenak, ibilbide profesional eta pertsonal oso ezberdina dutenak”.
Hala, 2019ko hauteskundeetarako zerrendako 13 postuetan ondorengo bost izenak joango dira:
- Borja Olazabal (34 urte): Kirol kazetaria da, komunikabide ugaritan aritutakoa (Independentea).
- Rebeca Gonzalez (40 urte): Marketineko sektorean egiten du lan, eta idazle gisa ere aritu da. Belaskoenea bizilagunen elkarteko boluntarioa da.
- Jon Ugarte (38 urte): Estatuko Aldizkari Ofizialeko teknikari koordinatzailea da. Orain, geografia eta historia ikasten ari da.
- Sergio Javier (25 urte): Aholkularitza eta gestorian egiten du lan. CD Bidasoa eskubaloi taldeko base taldeetako jokalaria izandakoa (Independentea).
- Juan Segador (56 urte): Gizarte Segurantzan egiten du lan. CCOOko ordezkaria izan da 30 urtez.