Zertarako memoria, ez bada gogoratzeko
Egiluze ikastetxeko 4. DBHko ikasleen oroimen historikoari buruzko film laburrak sortu dituzte. Ostiralean proiektatuko dituzte Itsas Etxean.
Memoria historikoa lantzea helburu duen Hau ez da pelikula bat programako bost film labur estreinatuko dituzte ostiralean Hondarribiko Itsas Etxea Auditoriumean, 19:00etan. Egiluze (San Jose) ikastetxeko 4. DBHko ikasleek sorturiko film laburrak dira, Foru Aldundiko Bizikidetza eta Giza Eskubideen Departamentuak eta Arazi enpresak elkarlanean sustaturiko Hau ez da pelikula bat sentsibilizazio programa pilotuaren barruan.
Hiru hilabetez, dokumentuak ikertu, lekukotasunak bilatu eta garaiko testigantzak bildu dituzte ikasleek. Bost taldetan banatuta egin dute lana, eta beste horrenbeste pelikula labur sortu dituzte. “Garai hartako biktimen oroimenaren eguneraketan eta erreparazioan lagunduko duten film laburrak” direla nabarmendu du Egiluzek.
Hezkuntza zentroak azaldu duenez, ikasleek “gerra eta diktadura pairatu zuten biktimen oroimena” berreskuratzen jardun dute, garai hartan Hondarribian gertatu zirenak ezagutu eta ulertzeko: “Hondarribiko gertaeren berreskurapena eta haien azaleratzearen garrantzia azpimarratzeaz gain, giza eskubideen urraketa nabarmentzen duen programa da, egungo gertaerekin zubia sortuz”.
Modu horretara, ikasleek memoria historikoaren inguruan hausnartzea bilatu du ikastetxeak: “Ikasleen jarrera kritikoari, sentsibilizazioari eta hausnarketari bide ematen dion ekimena da, urte haietan gertaturikoaz ikasi eta etorkizun oparoagoa sortzeko baliabideak eskaintzen diena”.
Gonbidapenak, ikastetxean
Ostiralean, 19:00etan proiektatuko dituzte Hau ez da pelikula bat programarako Egiluzeko 4. DBHko ikasleek sorturiko film laburrak. Orotara, 55 minutuko proiekzioa izango da.
Sarrera doan da baina ezinbestekoa da gonbidapena lortzea. Ikastetxeko idazkaritzan banatuko dituzte ostiraleko 14:00ak arte. Agortuko ez balira, Itsas Etxeko sarreran izango da gonbidapenak eskuratzeko aukera.
