Sanmartzialetan oholtza gainera igo nahi duten taldeek jada izena eman dezakete
2019ko jaien musika programazioa prestatzen hasi da udala. Datorren martxoaren 4ra bitarte apuntatzeko aukera izango dute hiriko taldeek.
Sangre de Mono izan zen 2018ko sanmartzialetan kontzertua eskaini zuen hiriko taldeetako bat. Irungo Udaleko Kultura saila dagoeneko sanmartzialei begira jarri da. 2019ko jaien musika programazioa prestatzen hasi dira, eta jakinarazi berri dutenez, datorren martxoaren 4ra bitarte kontzertua eskaintzeko asmoa duten taldeek izena eman dezakete.
Dagoeneko Irungo taldeek jotzeko proposamena bidali dezakete, Irungo udaleko webgunean eskura izango den orria bete eta udaleko helbidera bidalita. Proposamenak jaso ostean, Irundarrek aukeratuko dituzte San Juan plazako edota Urdanibiako oholtza gainera igoko diren taldeak.
Izena emateko baldintzak, honakoak: taldeko kideen %50a Irunen erroldatuta egotea, gutxienez 60 minutuko kontzertua eskaini ahal izatea eta uztailaren 22, 23 edota 28an jotzeko aukera izatea. Gainera, iazko jaietan jo zuten taldeek aurten ezingo dira berriz aurkeztu. Udaletik diotenez, proposamenak bidaltzeko azken eguna hilaren 27a izango da eta aukeratutako taldeek 1.000 euro jasoko dituzte.
