Pilar Soberonek hasiera emango dio Menchu Gal aretoaren denboraldi berriari
Ostiralean (hilak 22) inauguratuko dute erakusketa, eta datorren maiatzaren 12ra bitarte bisitatzeko aukera izango da.
Pilar Soberon, Juncal Eizagirren Kultura saileko ordezkaria eta erakusketaren komisario Helena Elbusto. Aurten, 100 urte beteko dira Menchu Gal artista irundar ospetsua jaio zela, eta bere omenezko aretoan ekitaldi mordoa antolatu dituzte 2019rako. Pilar Soberon izango da denboraldi berri eta berezi honi hasiera emango diona, ‘Hodei putzua’ erakusketarekin.
Land-Art mugimendutik dator Soberon, naturarekiko kontaktutik eskuratutako materialekin egindako artea da. Obrak sortzeko, petaloak edota mineralak biltzen ditu, eta urmaelen argazkiak ere egiten ditu. Hala, erakusketa berrian, argazki mosaikoak landare eta mineralekin konbinatu ditu.
Ostiralean (hilak 22) inauguratuko dute erakusketa, eta datorren maiatzaren 12ra bitarte bisitatzeko aukera izango da. Inaugurazio ekitaldi ofiziala 19:00etan izango da. Bestalde, ostiral eta larunbatetan (18:00etatik 21:00etara) edota igande eta jai egunetan (11:30tatik 13:30tara) bisitatu daiteke.
