Pio Baroja Institutuko ikasleek zuzendaritzaren "errepresioa eta inpunitatea" salatu dute
Joan den astean irakasle batekin izandako liskarragatik ikasle bat kanporatzeko arriskuan egoteaz gain, irteera batetara joateko debekua eman diote salatu dute klasekideek.
Ehunka ikaslek egin zuten iaz bi orduko paroa Pio Barojan, irakasle batekin izandako liskarragatik. Irungo Pio Baroja Institutuko ikasleek bi orduko geldialdia egin dute gaur. Ikasle Abertzaleak-ek deituta, zuzendaritzak ikasleekiko duen errepresioa salatu dute ehunka ikaslek, bereziki joan den astean ikasle batekin gertatutakoa. 9:50tatik 11:55tara klaseak hustu dituzte, eta patioan bildu dira, ‘Hemen ez da inor damutzen’ titulupean.
Ikasle Abertzaleak-ek salatu duenez, “guztion artean ezaguna da” aurreko astean ikastetxeko irakasle eta ikasle baten artean gertatutakoa. “Jakin badakigu irakasle honekin klaseak jasanezinak direla eta bere ikasleek mila arazo eduki izan dituztela kurtso osoan zehar, ezin dutela gehiago”. Gainera, irakasle horren jarrerarengatik kexatzeagatik ikasle bati irteera batetara joatera galarazi diotela salatu dute, eta 21 eguneraino iritsi zitekeen kanporatzearekin mehatxatu dutela. Irakasleak gaizki jokatu zuela salatu dute gaur ikasleek, eta “irakasleek ikasleen aurka autoritarioki joka dezaketela” nabarmendu dute, “inpunitate guztiarekin”.
Hala, gaurko geldialdian babes osoa adierazi diote irakaslearekin liskarra izan zuen ikasleari. “Pio Barojako ikasle guztiak bat gara, eta azken aste honetan gertatukoaren guztiz aurka gaude, zigor eta umiliazio hau jaso duen ikaslea babesten dugu”. Amaitzeko, irakasleen “autoritarismoaren inpunitatearekin” amaitzea eskatu dute, eta zuzendaritzari prestutasun osoa erakustea exijitu diote, arazo honi benetako irtenbide bat emateko.
