Hondakin organikoen bilketak nabarmen gora egin du Bidasoan, Europako helburuak gainditzera iritsi arte
Edukiontzi bidez jasotzen duten frakzio guztien tasa hazi da, baina igoera nabarmenena hondakin organikoena izan da, %21ekoa.
Hondakin organikoen birziklatzea %21ean hazi da. 2018an %20,21 egin du gora Hondarribian eta Irunen gai organikoen bilketak. Hala adierazi du Txingudiko Zerbitzuak erakundeak (Txinzer) 2018ko hondakinen birziklatze mailaren berri emateko egin duen balorazio oharrean. Gaika edukiontzi bidez jasotzen diren beste hiru frakzioen birziklatze tasek ere (papera, beira, ontziak) gora egin dute 2018an, %6,12n jarriz igoeraren langa. Hau da, 2017an 8.540 tona hondakin jaso zituen Txinzerrek edukiontzi bidez, eta 2018an, 9.063. Beraz, Bidasoko birziklatze tasa %51,26ra heldu da 2018an, “Europak 2020rako ezarritako helburua gaindituz’, Txinzerren esanetan.
Txinzerrek beste datu bate eman du: 2018an 21.059 tona hondakin bidali zituzten zabortegietara (Bidasoan birziklatze sistematik kanpo dauden hondakinak), eta 2017an, berriz, 22.017. Hau da, ia mila tona gutxiago. “Jaitsiera horrek ingurumenari onura ekartzeaz gain, herritarrentzat aurrezki ekonomikoa ere suposatzen du”.
Leire Zubitur Txinzerreko kudeatzaileak era oso baikorrean baloratu ditu datuok. Baina hondakin organikoen gaian indar gehiago jartzeko asmoa azaldu du: “Kontuan hartu behar dugu materia organikoa zaborraren %40 dela gutxi gorabehera, beraz, lanean jarraitu behar dugu baliabideak errazten eta herritarrak sentsibilizatzen”. Iaz, 3.147 tona hondakin organiko jaso ziren Bidasoan, 2017an baino 529 gehiago. Hau da, edukiontzi bidez jasotako hondakin guztien %30 inguru da organikoa, nahiz eta etxeetan egiazki sortzen dena %40koa izan. Bidasoan, 2018ko bukaeran, 20.788 etxebizitzetako biztanleak prest agertu ziren era boluntarioan organikoa bereizteko.
