'Eta orain zer?' galderari erantzungo diote Gazteartean bekaren onuradunek
Ainhoa Barroso de la Mata, Cristina Alvarez Nuñez eta Alejandra Pascual irundarrek eskuratu dute beka. Irungo gazteriaren inguruko ikerketa antropologikoa egingo dute.
Bekaren aurkezpenaren irudia. 2019ko Gazteartean Bekak baditu irabazleak. Gaur aurkeztu dute lehen edizioko beka jasoko duen ikerketa lana udaleko ordezkari Monica Martinez eta Gazteria saileko arduradun Eunate Enciasek. Eta haiekin batera, onuradun izan diren Ainhoa Barroso de la Mata, Cristina Alvarez Nuñez eta Alejandra Pascual irundarrak izan dira.
‘¿Y ahora que?/Eta orain zer?’ proiektua aurkeztu dute hiru neskek, Irungo gazteriaren inguruko ikerketa antropologikoa. Zehazki, ikasketak amaitu ostean hiriko gazteek dituzten aukeren inguruko azterketa sakona izango da, eta etnografia erabiliko dute ikertzeko teknika gisa. Eta guzti hori, genero ikuspegitik. “Gure helburua Irungo gazteriak dituen arazo eta ideiak ezagutzea da, eta ‘orain zer’ galdera horri erantzuna ematea”, adierazi dute bekaren onuradunek.
Ikerketa lanerako, hirukoteak 8.000 euro jasoko ditu, eta gehienezko 8 hilabeteko epean egin beharko dute prozesu guztia. Ikerketa amaitu ostean, formatu askotan argitaratzeko aukera izango dute.
