Artia, Arbes eta Dunboako bizilagunekin bilduko da Ahal Dugu taldea
Hiru auzoetan bizilagunek pairatzen dituzten aparkatzeko arazoen berri jakin nahi dute, eta horretarako, mahai ingurua antolatu dute datorren astearterako.
Aparkalekuen gaiaz bizilagunek duten iritzia jaso nahi dute. Arbes, Artia eta Dunboa auzoetako bizilagunekin bilduko dira Ahal Dugu Irun taldeko kideak. Taldetik jakinarazi berri dutenez, hiru auzoetan bizilagunek pairatzen dituzten aparkatzeko arazoen berri jakin nahi dute, eta horretarako, mahai ingurua antolatu dute datorren astearterako (hilak 29), 19:30ean, Palmera Montero Gunean.
“Auzo horiek urte luzez aparkalekuen falta pairatu behar izan dute”. Kasu batzuetan bizilagunak ia ordubetez aparkaleku bila ibiltzen direla salatu dute, autoa espaloian uztera behartuz. Jose Antonio Santano alkatearen politiken ondorioz, autoa “luxuzko artikulu” izatera pasatzen ari dela diote, eta irundar askoren beharren aurrean ikusiezinarena egitea leporatu diote udal gobernuari.
“Kaleko aparkalekuak kentzeko konponbidea ezin da lur azpiko aparkalekuak eskaintzera mugatu”, diote talde moretik. Horregatik erabaki dute Arbes, Artia eta Dunboako bizilagunekin elkartzea, euren esperientziak eta eguneroko arazoak gertutik ezagutzeko.
