Via Irun proiektua "lasaitasunez eta era sakon batean" lantzea eskatu du EH Bilduk
Proiektua Irunentzat "guztiz estrategikoa" dela diote eta horregatik, proiektua "arduraz eta era egokian" egitearen garrantzia nabarmendu dute.
Dani Berasategi, Jokin Melida eta Joxe Cayetano EH Bilduko zinegotziak. Irungo EH Bildu taldeak Via Irun proiektua diseinatzeko prozesuaren inguruko gogoeta egin berri du. Proiektua Irunentzat “guztiz estrategikoa” dela diote eta horregatik, proiektua “arduraz eta era egokian” egitearen garrantzia nabarmendu dute. “Ezaguna da EH Bilduk herriaren benetako parte hartzea bultzatu duela beti, are gehiago hain estrategikoak diren proiektuen inguruko erabakietan”.
Lehenik, Irungo Udalak proiektua garatzeko prozesu parte hartzailea irekita dagoela adierazi dute, baina taldearen ekimenez izan zela gogoratu dute, “udalaren asmoetan herritarrek ez baitzeuden hasieratik parte hartzen”. Halere, herritar eta elkarteei bideratutako saio presentzialak bukatu ostean, parte hartu duten askok saioak motz geratu direla salatu dutela diote taldetik. Hala, prozesu presentziala luzatzea eskatu diote udal gobernuari, gaia “lasaitasunez eta era sakon batean” lantzeko.
Webgunearen bidez ekarpenak egiteko aukera horrek ere “ageriko mugak” dituela salatu dute: “herritarrek euren ekarpenak bidal ditzakete, baina ez dago ideiak elkar trukatzeko, eztabaidak sustatu eta adostasunetara iristeko espaziorik”.
