Positiboki baloratu du udalak Gabonetako kanpaina

Zabaltza plazako izotz pistak eta txirristek izan dute arrakasta gehien. Azken kalkuluen arabera, 14.500 pertsona baino gehiago gerturatu dira plazara.

Imanol Saiz

Irun

2019/01/09

Aurtengo Gabonetako kanpainan hamaika ekitaldi eskaini dituzte. Irudian, kale antzerkia.

Gabonak amaituta, azken asteetan Irungo Udalak bultzatu duen kanpainaren inguruko balantzea egiteko unea iritsi zaio Hiri Bultzada sailari. 2018ko Gabonetako programak ekitaldiak, merkatua, musika animazioa, kale antzerkia, bideo-mapping saioak edota ikuskizunak jaso ditu, egitarau zabala eskaini dute abendua erdialdetik hilaren 9ra bitarte. Miguel Angel Paez ordezkariak baikor baloratu du kanpaina: “Lehen inpresioak eta datuak biltzen hasi gara, eta lehen balorazioa positiboa da”. Ordezkariak nabarmendu duenez, hiriko merkataritzari bultzada emateko baliagarria izan da, eta adin tarte guztiek euren txokoa aurkitzeko aukera izan dute Gabonetan. Udalaren arabera, bereziki Zabaltza plazako izotz pistak eta txirristek izan dute arrakasta gehien, etxeko txikienen artean batez ere. Hala, udalaren azken kalkuluen arabera, 14.500 pertsona baino gehiago gerturatu dira plazara; orain arteko daturik onena da (iaz adibidez, 7.005 lagun pasatu ziren bertatik). Aurtengo kanpainaren berritasun nagusia San Juan plazan jarritako Gabonetako merkatua izan da. Udaletik diotenez, merkatariek oso positiboki baloratu dute esperientzia berria. Gainera, kaleko giroa animatzeko aurrera eraman dituzten ekintzek ere herritarren oniritzia jaso dutela diote Hiri Bultzada sailetik, eta Amaia Kultur Zentroak zein Oiassok ere bisita ugari jaso dituela. Gabonetako kanpainarako, Irungo Udalak 300.000 euroko aurrekontua izan du (Amaia Kultur Zentroan egindako ekitaldiak kontuan izan gabe).

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.