Jaizkibelen zatitxo bat Irunen
Jaizkibel mendiaren zaintza eta kontserbazioa izan da Miriam Loidi sortzaile gazte irundarraren azken lanaren oinarria. Martindozenean ikusgai dago lan horren emaitza.
Joan den larunbatean zabaldu zituen ateak Jaizkibel bidea eginez erakusketak.
Jaizkibel mendiaren zaintza eta kontserbazioa izan da Miriam Loidi sortzaile gazte irundarraren azken lanaren oinarria. Martindozenean ikusgai dago lan horren emaitza.
Jaizkibel mendia eta artea. Bi ideia horiek batera ikusteko aukera dago jada Martindozenea Gaztelekuan, erakusketa berezi batean. Irungo Udaleko Gazteria Sailak, hilero egiten duen bezala, hiriko gazte bati aukera eman dio artearen munduan emandako lehen pausoak plazaratzeko,?Gazteartean Expo egitasmoaren barruan. Hala, Jaizkibel bidea eginez erakusketa inauguratu zuten joan den larunbatean, eta azaroaren 4ra bitarte bisitatzeko aukera izango da, doan. 21 urteko Miriam Loidi izan da Gazteartean Exporen azken egitasmoaren onuraduna. Arte Ederretan lizentziatutakoa da eta gaztea izan arren, aurretik esperientzia bildutakoa da, azken urtean erakusketa mordoa egin baititu Euskal Herrian eta harago. Aurten bukatu berri ditu ikasketak, eta Gradu Amaierako Lan Artistikoaren zatitxo bat da egun Irunen ikus daitekeena. «Proiektuaren helburua hasiera batean mendia ezagutzea zen, jendea mendian ibiltzera animatzea eta Jaizkibel gehiago ezagutzea. Eta zergatik? Mendia zaindu eta berreskuratzeko, artearen bitartez, noski», kontatu du irundarrak. Helburua zehazturik, proiektua hasi zuen orain dela hilabete luze, naturaren zaintza eta artearen harremana sendotzen jarraitzeko asmoz. Proiektu propioa izan arren, bizilagun, senide eta lagunekin elkarbanatu nahi izan du esperientzia, horiek ere artelanaren protagonista bilakatuz: «Hasiera batean uste nuen proiektua nirea izango zela bakarrik, baina azkenean erabaki nuen proiektu parte hartzaile bat egin nahi nuela». Hala, azken hilabeteotan 31 lagunek mendia goitik behera zeharkatu dute, artista irundarrak proposatutako bideak zapaldu dituzte, ezohiko mendi irteerak eginez. Ibilbide hori guztia lau zati edo baldintza nagusitan banatu du Loidik. Lehena oinezko ibilbide bat egitea izan da, arte prozesuari hasiera eman eta irundarrak maite duen oinez ibiltzeko arteari otoi egiteko. «Presarik gabe mendia zeharkatzeak naturarekin zuzenean konektatzen gaitu, oso aberasgarria da». Bigarrena, txoko horietan argazkiak ateratzea izan da, bakoitzak bere begitik natura nola ikusten duen irudikatzeko. Beste baldintzetako bat, eta garrantzitsuena (proiektuaren funtsa, alegia), Jaizkibel ingurutik zaborra biltzea izan da, pausoz pauso mendia berreskuratzeko bidean. Eta amaitzeko, partaideek naturako elementu bat jaso dute, bakoitzak nahi izan duena. Proiektuak atal asko biltzen dituen arren, ibiltzearen praktikan eta bereziki zabor bilketan jarri du garrantzia irundarrak.
Bildutako zaborrarekin irudi ikusgarriak sortu ditu.
