Euskaraldia mamituko duten Belarriprest edo Ahobizi izateko izen emate epea irailaren 20an abiatuko da. Internetez eta HAZ bulegoan egin daiteke.
![Euskaraldia](http://bidasoa.hitza.eus/site/files/2018/09/Euskaraldia.jpg)
Irunen Euskaraldia bultzatzen dutenak.
Martxan ari dira Euskaraldiaren prestaketa lanean irundarrak. Horren seinale, ondoko argazkia. Bertan daude azaroaren 23tik abenduaren 3ra egingo den ekinaldia prestatzen ari direnak, ilusioz. Hizkuntza ohiturak aldatzeko egitasmoa da Euskaraldia, Euskal Herri osoan egingo dena, 350 udalerritan hain zuzen. Udalak bat egin du egitasmoarekin, eta oharra bidali du hedabideetara, argazki jendetsu eta guzti: irundar ezagunak daude bertan, ez hain ezagunak ere, baita hiriko hainbat eragiletako ordezkariak ere.
Monica Martinez Euskara ordezkariak iniziatiba babestu egin du, hiriko norbanakoen eta eragileen interesa eskertuz: “Irunen Euskaraldi bikaina izateko, guztiok euskararekin animatzeko, pertsona bakoitzak bere ahalmenaren arabera, eta guztiok batera euskararen erabilera bultzatzeko hiriaren egunez egunekoan, eta ez bakarrik egun horietan”. Ariketa soziala izango da Euskaraldia, euskararen erabilera areagotzeko. Horren muinean, bi figura: Ahobiziak eta Belarriprestak.
- Ahobiziak: ulertzen duen orori euskaraz egingo dio, hark erdaraz erantzun arren. Ezezagunei, lehen hitza, gutxienez, euskaraz egingo die.
- Belarriprestak: harekin euskaraz aritzeko gonbidapena luzatuko du, ulertu egiten baitu. Euskaraz edo erdaraz erantzun ahal izango du, baina euskaraz egin diezaioten nahiko du.
Soinean eramango duten txaparekin identifikatuta egongo dira Ahobiziak eta Belarriprestak. Norberak, bere inguruan, bere ohiko harreman sarean egingo du ariketa: familian, lagunartean, lanean, eskolan, dendetan… Hizkuntzarekin dauden inertziak astintzea eta uste baino gehiagotan euskarazko komunikazioa posible dela frogatzea izango da helburua.
Txapak jaso eta Euskaraldian parte hartzeko, aldez aurretik izena eman beharra dago. Irailaren 20an hasiko da izen-emate epea. Internet bidez egin ahal izango da,
Euskaraldiaren webgunean. Aurrez aurre eta paperean izena emateko aukera ere badago, HAZ bulegoan (San Martzial kalean dago).