San Martzial-Txingudi eremuan teniseko nahiz padeleko (estaliak) hiru pista erabiltzeko aukera izango dute, astelehenetik aurrera, kirolzaleek.
Pisten irudi orokorra.
Hilaren 17an, astelehenean, kirol azpiegitura berritua izango dute eskura irundarrek. Tenisera eta padelera jokatzeko pista berriak zabalduko dituzte orduan San Martzial-Txingudi eremuan. Horrela, zonalde hori biziberritzeko lehenengo fasea bukatutzat emango dute, izan ere, itxi berri diren udako igerilekuen osagarri baitira pistak.
Teniseko hiru pista (material sintetikokoak) eta hiru padel jokaleku estali. Horiek kirol azpiegitura osatzeko baliabideak. Azken horiek egiteko 432.000 euro erabili ditu udalak; horiei erantsi behar zaizkie bai igerilekuak zein zerbitzu eraikinak altxatzeko erabili zituzten beste 1.942.686 euroak. Hortaz, orotara, 2,4 milioi eurokoa izan da, orain arte, San Martzial-Txingudi eremuan egin den inbertsioa.
Kirol pista berrien hainbat xehetasun, ondoko zerrendan:
- Ordutegia: astelehenetik ostiralera 17:00etatik 21:00etara egongo dira zabalik. Larunbat eta igandetan, 10:00etatik 14:00etara.
- Prezioa: Irungo kiroldegietako bazkide direnentzat 4 euro orduko; ez direnentzat 5. Klub batek alokatzen badu, orduko 20 eurokoa izango da tarifa (Irunen egoitza duten klubek %75eko deskontua dute).
- Nola joan: autoz joan daiteke, aparkalekua badago. Baina L3 autobus linea erabiltzea aholkatu dute. Artia eta erdialdea lotzen dituen autobus zerbitzuaren maiztasuna 30 minutukoa da.
- Erreserbak egiteko: bertan (harrera zabalik dagoenean), edo 943 62 72 66ra deituz.
Cristina Laborda Irungo Udaleko Mugikortasun, Bide Publiko eta Lan ordezkariak, eta Kirol arduradun Pedro Alegre izan dira gaur azpiegitura gainbegiratzen. Pozik azaldu dira ikusitakoarekin. Esan dutenez, pistak berritzeko lehen zuten espazioa optimizatu dute igerilekuen gunearekin bat egiteko. Aldi berean, hirian bi kirol horiek (tenisa eta padela) dituzten jarraitzaileei erantzuna eman dietela ziurtatu dute.
Udako igerilekua
Gaurko bisitaldian udako igerilekuetan jasotako hainbat datu eman dituzte udaleko ordezkariek. Ia bi hilabetean, bertako igerileku irekietan (berdegune zabala dute). 11.750 erabiltzaile izan direla azaldu dute, 4.447 uztailean, 6.364 abuztuan eta 939 irailean. Berritasuna izanda, baikor baloratu dituzte kopuru horiek. Horietatik 4.000 erabiltzaile garraio publikoan joan direla zehaztu dute.
Hein berean, hara joateko oinezkoentzako bidea hobetzeko konpromisoa adierazi du udalak. Lanak esleitzeko Gipuzkoako Foru Aldundiaren baimena falta dela esan dute udal ordezkariek; aldundia oinezkoen bidearen lurren jabe.
