[Bideoa eta galeria] Hamabigarrena ere herriarena da

Kontxako hamabigarrena herriari eskaini baino, herritarrei eman zien atzo arratsaldean Hondarribia Arraun Elkarteak. Jai giro betea izan zen herrian.

Asier Perez Karkamo

Hondarribia

2018/09/10

Arraunlariak, udaletxean, banderarekin.

Herriari, nori bestela, eskaini zioten atzo Hondarribia Arraun Elkarteko arraunlariek hamabigarren Kontxa. Igandea, jaiak, eguraldi ona… eta Kontxa etxean. Zer gehiago zoriontsu izateko? Asko ez. Berdea nagusi atzo herrian, herri osoak bat egin zuen arraunarekin, arraunlariekin. Doi-doi irabazi zuen Kontxa Ama Guadalupekoa ontziak atzo. Distantziak, ehunekoek, ez dute inporta. Historian geldituko dena da berriz ere, XXI. mendean hirugarrengoz, Kontxa Hondarribian dela. Palmares orokorrean laugarren da herria, hamabirekin; aurretik Orio, San Pedro eta Donostia ditu. Horrela jarraituz gero, etxekoekin batez ere bogan, horiek harrapatzeko gai izango da arraun elkartea. Donostiako portuan astindu ondoren, eta bazkariko aulki nagusian egon ondoren, 19:00ak pasata zirenean iritsi zen bandera, Joseba Amunarriz patroiaren eskutik, herrira. Aurretik, 18:00etan, Irunen egonak ziren hango udalaren harrera ofizialean berdeak. Kale Nagusia jendez lepo. Zer zen hori! Ohorezko aurreskuaren ondoren, udaletxeko balkoi nagusitik ezker eskuin astindu zuten bandera preziatuena arraunlariek, ondoren, kalejiran ere, festa giroan, Hermandadera joateko. Festa betea. Errepikaezina, ia. Ondorengo bideoa eta irudiak arratsalde zoriontsu baten kronika dira. Gozatu.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.