Hondarribia Arraun Elkarteko hiru traineruek lan handia izan dute asteburuan, eta ona: aurkeztu egin dira, eta uretan emaitza oso onak lortu dituzte.
Hondarribiko hiru traineruetako kideak, larunbateko aurkezpenean. Argazkia: Hondarribia Arraun Elkartea.
Asteburu oparoa izan da Hondarribia Arraun Elkartearentzat. Batetik, larunbat arratsean, San Joan bezperako suaren testuinguruan jai giroan aurkeztu zituen herriko taldeak bere hiru traineruak. Bestetik, batez ere gizonen lehen traineruak eta emakumeenak oso maila altua azaldu dute Eusko Label Ligako lehenean eta Emakumeen Traineru Elkartearen (ETE) Ligako bigarrenean, hurrenez hurren.
Ama Guadalupekoa-k izugarrizko estropada egin zuen atzo Bilbon, Eusko Label Ligako lehenean. Bigarren izan ziren, azken denboran Urdaibai lehenetik bi segundora. Baina ziaboga guztietan aurretik izan ziren hondarribiarrak, eta azken luzean eraman zuten bermeotarrek bandera zakura. Erlojupekoa izan zen Bilboko lehia. Galdera: lineako estropada balitz, emaitza hori izango al zen? Hau da, begien aurreko erreferentziekin —ez bakarrik kronometroenak— Hondarribiak ez al luke irabaziko? Bai, beharbada.
Edonola ere, Mikel Orbañanosek prestatzen duen taldeak sekulakoa egin zuen Bilbon. Datu bat: lehen sei sailkatuak (Urdaibai, Hondarribia, Santurtzi, Zierbena, Donostiarra eta Orio, hurrenkera horretan), bederatzi segundoko tartean izan ziren. Eusko Label Liga zirraragarria izango da, traza hori du.
Bestalde, KAE2ko gizonen trainerua seigarren izan zen Elantxoben atzo egindako estropadan. Oso postu ona.
Emakumeak, Euskotrenerako postuetan
Larunbatean izan zen Hondarribiko emakumeen trainerua lehiatzen, Donibane Lohizunen, ETE Ligako bigarrenean (ez zen puntuagarria). Laugarren izan ziren. Postu hori hurrengo asteburuan egitekoa den Euskotrenerako bi sailkapen estropaden baturaren emaitza balitz, emakumeen liga handiko partaide litzateke Hondarribia. Kontuan hartuz aurten berreskuratu duela arraun elkarteak emakumeen ontzia, eta partaideen gaztetasuna ikusita, Euskotrenen egotea, bere horretan, arrakasta handia litzateke Iker Cortesek entrenatutakoentzat. Larunbat arratseko traineruen aurkezpenean, irribarre handiena emakumeen traineruko kideena izan zen.
Lapurdiko herriko lehian nagusi izan zen San Juan, erraz (15:05). Arrosetatik 14 segundo atzerago iritsi zen Orio, eta Donostia Arraun hirugarrena 31 geroago; Hondarribia, pasaitarretatik 37 segundora iritsi ziren helmugara. Hau da, San Juan eta Orio ukiezinetatik gaindi, iazko Kontxan eta Euskotrenen egon zen Donostia Arraunetik 6 segundora sailkatu ziren berdeak, eta ETEko lehen estropadan hirugarren izan zen Deustu, atzean utzi zuten, bost segundoz.
Hondarribiko emakumeen trainerua: suziriak erosi, baina ez bota oraindik. Euskotren Ligan egoteko aukera (oso) errealak dauzkazue, baina aste honetan aurretik egindakoa ahazten saiatu, eta eutsi Sestaon eta Zierbenan egingo diren sailkapen estropadei behar adinako konfiantzarekin, baina harrotasunik gabe.
