Aitzpea Gonzalez eta Osertz Gonzalez Espainiako selekzioak deitu ditu, asteburuan Espainiako Txapelketan egin duten lan onagatik.
Osertz Gonzalez laugarren izan zen bere kategorian.
Asteburu honetan jokatu da Banyoles-eko urtegian (Girona, Katalunia) Aulki Mugikorreko Espainiako Txapelketa, Senior eta Gazte mailetako kategorietan. Santiagotarrak elkarteak 16 arraunlari eraman zituen lehiara, eta nabarmena, Aitzpea Gonzalezek emakumeen 23 urtez azpikoen skiff-ean lortutako zilarra. Emaitza horregatik, Espainiako Arraun Federazioak deitu egin du Gonzalez Banyolesen bertan egitekoa duen egonaldira; han egindakoaren arabera, Europan egin beharreko lehiaketetan parte hartzeko eskubidea izan dezake arraunlariak.
Osertz Gonzalezek ere Espainiako selekzioarekin kontzentraziora joateko eskubidea lortu du asteburuan, Gazte Mailako skiff-ean Espainiako laugarren izan delako; hark Sevillan izango du kontzentrazioa uztailaren 6tik 8ra.
Santiagotarrak-en beste emaitzak, honakoak:
- Lemazaindun zortzikoan laugarren izan zen elkartearen ontzia, honako partaideekin: Garazi Lasarte, Elene Lopetegi, Nerea Seijo, Aitzpea Gonzalez, Ane Marcos, Jessica Berra, Irati Etxarte, Lorea Iñarra eta Elur Grijalba (lemazaina).
- Garazi Lasarte eta Nerea Seijo bosgarren izan ziren Senior Mailako scull bikoitzean.
- Lauko scull-ean, Maila Absolutuan, Jokin Indias, Ander Legazkue, Mikel Aragon eta Asier Reguero laugarren izan ziren.
Ur biziak
Santiagotarrak-en ur bizietako sekzioko kideek ere izan dituzte lehiak asteburuan. Klara Olazabal hamazazpigarren eta Joan Crespo hogeita hamargarren izan dira Eslovakiako Liptovsky Mikulas herrian jokoan izan den Munduko Kopako lehen lehian.
C1 modalitatean jardun zuen Klara Olazabalek. Sailkapenetan zortzigarren izan zen, baina finalerdian, akats txiki bat medio, finaletik kanpo geratu zen.
Joan Crespok K1 modalitatean egin zuen lehian. Sailkapen estropada ona egin zuen, baina finalerdietan azken fasera sailkatzeko postuetatik urrun geratu zen.
Bidasoko bi kirolariak Poloniako Krakow hirira joan dira, bertan izango dutelako jokoan Munduko Kopako bigarren proba. Hirugarrena Alemanian da, Augsburgen.
