Gazteek alokairuzko etxeetara joateko laguntza dute

Urtebetez, hileko 100 euroko laguntza jaso dezakete Irungo gazteek .Ordainduko den errentak ez du 700 eurokoa baino handiagoa izan behar

Urko Etxebeste Petrirena

Irun

2018/06/08

Gehienezko errentak 700 eurokoa izan behar du.

23-35 adin tarteko irundarrek alokairuzko etxebizitzetara bizitzera joateko aukera izan dezaten diru laguntza lerroa prestatu du Irungo Udalak. Baldintza zehatzak bete behar dituzte gazte horiek. Oinarrizkoenak, honakoak: errentan hartuko den etxearen prezioa ez da izan behar 700 eurotik gorakoa; interesdunaren urteko diru sarrerak 9.000 eta 24.000 euro artekoak izan behar dira; eta Irunvin —udalaren etxebizitzen kudeaketarako sozietatea— izena emana izan behar dute. Laguntza jasoko dutenek hilabetero 100 euro eskuratzeko aukera izango dute, urtebetez. Hau da, urtebetean 1.200 emango dizkie udalak alokairuzko etxearen errenta ordaintzeko. Baina xehetasun gehiago eman zituen atzoko agerraldian Jose Antonio Santano alkateak: «Eskatzailea familia unitate batekoa bada, horretako kide bat gutxienez Irunen erroldatuta egon behar da, eta horrez gain, alokairuzko etxebizitzak alokatzeko dauden beste diru laguntzak ez ditu jaso behar». Alkateak esan zuenez, 18 urtetik gorako irundarren %4k egun bizi den etxebizitza utzi nahi du. Baina horietatik lautik batek du bakarrik aukera ekonomikoa bertatik joateko. Era berean, udala alokairuzko etxebizitzen merkatua mugiarazteko egiten ari den lanaren barrukoa da iniziatiba. Eskaerak Laguntza eskaerak abuztuaren 31ra arte egin daitezke, Irunviren egoitzan (Eliza kalean dago). Horiek eginda, udalak hiru hilabeteko epea izango du eskaerak aztertu eta ebazpena emateko; hori eginda kontratua aurkeztu beharko dute onuradunek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.