Beste etxebizitza ereduak aztertuko dituzte larunbatean

Hondarribiko EH Bilduk eta Hutsetik ilusiora Hondarribia kolektiboak 'Etxebizitza Eredu Alternatiboak' goiburuko jardunaldia antolatu dute.

Asier Perez-Karkamo

Hondarribia

2018/05/22

Etxebizitza pribatuen eraikuntza lanak, Zimizarga auzoan

Hondarribiko EH Bilduk eta Hutsetik ilusiora Hondarribia kolektiboak Etxebizitza Eredu Alternatiboak goiburuko jardunaldi irekia antolatu dute larunbaterako. Amuteko auzo elkartean egingo dute, 10:30ean hasita. Antolatzaileek, Bidasoan sortua den Hiritik At kooperatiba proiektuaren laguntza izan dute jardunaldia prestatzeko. Antolatzaileen esanetan, Hondarribiak beste etxebizitza politika bat behar du, eta aukerak badirela erakutsi nahi dute jardunaldiarekin: “Horrelako proiektuak abiatzeko garrantzitsuena zer den, zeintzuk diren zailtasun handienak, erakunde publikoen jarrera nolakoa izan den proiektu bakoitzaren aurrean… Horrelako galderen erantzunak argitu nahiko genituzke”, argitu du koalizioak. Hutsetik ilusiora Hondarribia kolektiboaren ustez, “gure herrian dauden etxebizitza hutsak eta erabilpenik ez dutenak berreskuratu eta pertsonen beharrizanen zerbitzura jarri behar dira”. Azken 20 urteetan Hondarribian babes ofizialeko 1.200 etxebizitza eraiki direla nabarmendu du taldeak, “992 etxebizitza huts, eta 951 erabilpenik gabe edo bigarren etxebizitza bezala egonik gure herrian”. Jardunaldirako, hainbat proiektutako ordezkariak gonbidatu dituzte: Le COL, Ipar Euskal Herrian abiatutako eta parte hartzean oinarritutako etxebizitza sozialen proiektua; Mendikoartea, Bidaurretako etxebizitza alternatiboen proiektua; Errenteriako gazteentzako etxebizitza komunitarioa; eta Abaraska etxebizitza kooperatiba. Egitasmo bakoitzaren aurkezpena egin ostean, mahai ingurua egingo dute. EH Bilduk jakinarazi duenez, publikoak galderak egiteko aukera izango du: “Dinamizatzaileak zenbait galdera orokor planteatuko baditu ere, publikotik ere galderak edo komentarioak egin ahalko dira”. Antolatzaileek erantsi dutenez, hainbat jardunaldietatik lehena izango da larunbatean Amuten egingo dutena.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.