Nesken garaipenak, mutilen porrotak
Futboleko eta saskibaloiko neskek irabazi dute asteburuan, futboleko eta eskubaloiko mutilek, galdu.
Azkenaldian bolada onean zeuden Senior Mailako mutilen kirol taldeak, bai futbolekoak, baita eskubaloikoak ere. Neskei, aldiz, luze egiten ari zaie denboraldiko bigarren fasea, futbolekoak nahiz saskibaloikoak euren mailako talde onenen kontra ari baitira igoera fasean jokatzen. Baina asteburuan neskenak izan dira garaipenak, eta mutilek galdu egin dute.
Erregionaleko taldeak sufritu behar izan zuen larunbatean azken tokian dagoen Touringi 1-2 irabazteko. Garaipenak Ostadar aurreratzeko balio izan dio taldeari eta zortzigarren jartzeko. Azken bost partidetan lasartearrek egutegi hobea dute, baina euren arteko norgehiagokan erabaki daiteke bietatik zein geratzen den hobeto.
Express Hondarribia Ikasbasketek, bere aldetik, Bilbon irabazi zuen, La Salle-Zurekin taldearen kantxan (60-61). Hondarribiarrek azken segundoan lortu zuten garaipena, Cristina Gonzalezen hiruko bati esker. 29 puntu lortu zituen Gonzalezek, sei hiruko sartuta. Hurrengo asteburuan etxeko azken partida jokatuko du taldeak, Lagunak Lakita Barañaingo taldearen kontra.
Mutilen porrotak
Ohorezko Mailako taldeak 0-4 galdu zuen Zarautzen kontra. Zarauztarrak ziren faborito baina errazegi irabazi zuten. Gainera, Urolak garaipena lortu zuen eta, oraindik urruti dagoen arren, jaitsiera ekiditeko borroka berotzeko balio izan du asteburuak. Porrotaren ondorioz lau postu galdu ditu taldeak. Oraindik Urola urruti dago, baina hurrengo partidan Oiartzuni irabaziko balio… Badaezpada, puntuatzea komeni zaio taldeari, aurrean zein duen begiratu gabe.
Eta eskubaloian, Il Capo Hondarribiak Euskal Liga bukatu du, 2-5 postuetako kanporaketako lehen partidan Txikipolitekin galduta (22-18). Ligako bigarren itzulian partida guztietan puntuatu eta gero, momentu erabakigarrienean iritsi da porrota. Pena! Arrasaten jokatu dute play-offa eta etxeko taldeak lortu du Basauri txapeldunarekin batera Espainiako Lehen Mailara igotzeko kanporaketa jokatzeko txartela.
Erregionaleko taldeak Touringi irabazi dio
