Asier Garagarzaren 'Uneak', Euskal Photo abiatzeko
Argazkilari tolosarraren erakusketa inauguratuko dute gaur Arma Plaza kultur gunean. Iaz, Argizaiola saria irabazi zuen Garagarzak.
Asier Garagarza argazkilari tolosarraren Uneak erakusketa inauguratuko dute gaur Arma Plaza kultur guneko goiko solairuan. 19:00etan irekiko dute erakusketa, egilea bertan egongo delarik. Argizaiola saria, Euskal Herrian deitzen den argazkilaritza lehiaketa garrantzitsuena irabazi zuen iaz Garagarzak.
Hilaren 29ra arte izango da Uneak bisitatzeko aukera, astelehenetik larunbatera 10:00etatik 18:00etara, eta igandeetan 10:00etatik 14:00etara.
Erakusketa, hilaren 20tik 22ra Hondarribian egingo den Euskal Photo biltzarraren lehen ekitaldiari lotuta dago. Besteak beste, hitzaldiak, tailerrak eta argazkilaritzako produktuen salmenta eta erakustaldiak bildu dituzte Euskal Photoren egitarauan.
‘Simplicity’, Asier Garagarzaren ‘Uneak’ erakusketak ikus daitekeen lanetako bat
