Zaisa Txingudi errugbi taldea, sasoiko partida garrantzitsuenaren aurrean

Zaisa Txingudik Bera Bera Bri irabazi behar dio bere taldeko lider jartzeko, eta beraz, Euskal Ligako Lehen Mailara igotzea errazago izateko.

Urko Etxebeste

Hondarribia,Irun

2018/04/11

Zaisa Txingudiko jokalariak.

Larunbatean, 16:00etan, Zaisa Txingudi errugbi taldeak partida erabakiorra jokatuko du Plaiaundin. Euskal Ligako Lehen Mailara igotzeko ezinbesteko du garaipena lortzea Bera Bera Bren aurrean. Sasoiko partida garrantzitsuena da bidasoarrena. Euskal Ligako Bigarren Mailan ari dira jokatzen beltzak. Denboraldiko bigarren fasean daude, igoerarena. Bidasoarrren multzoan lau talde daude, eta horietatik lehena sailkatzen denak lortuko du Lehen Mailarako igoera zuzena; bigarrenak, Lehen Mailako azkenaurrekoaren kontra jokatu beharko du igoera preziatuaren bila play-off modura. Hala, multzoan, Bera Bera da lider eta bigarren dira Txingudikoak. Larunbatean irabaziko balute, lider jarriko lirateke bertakoak, beraz, igotzeko aukera asko leudeke azken fasea bukatzeko bi partidaren faltan. Izan ere, fase horretako lehen itzulian Hernani eta Gasteiz taldeak gainditu zituzten bidasoarrek, eta partida bakarra galdu, Bera Bera Bren kontrakoa. Partida latza izango da larunbatekoa. Batetik, lehen itzuliko lehia guztiak irabazi dituztelako donostiarrek, tartean Zaisa Txingudiren kontrakoa. Bestetik, Bera Beraren lehen taldeak liga bukatu duenez, goiko taldeko errefortzuren bat izan dezake B taldeak. Baina etxean jokatuko du Txingudik, eta zelaia lokaztua egongo denez, hori etxekoen aldeko aldagaia izango da, azken hilabeteak egoera horretan izan baitute Plaiaundi, lohiz beteta, entrenamendu eta partidetan. Noski, zaleen laguntza eskatu dute Zaisa Txingudikoek. Ez zaie faltako.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.