Ia aulkirik gabe, Hondarribia Ikasbasketek Durangon galdu du
Lau partida geratzen dira liga bukatzeko eta Hondarribiko saskibaloi taldeari luze egiten ari zaio bigarren fasea.
Lau partida geratzen dira liga bukatzeko eta Express Hondarribia Ikasbasketeko lehen taldeari luze egingo zaio azken hilabetea. Larunbatean Durangon galdu zuen Tabirako Baqueren kontra (73-42), zazpi jokalarirekin bidaiatuta.
Bi urtez jarraian igo eta gero, hondarribiarrek Lehen Mailan mantentzeko helburua zuten denboraldiaren hasieran. Igoera faserako sailkatuta lortu zuten hori, eta urtarrila bukaeratik mailako talde onenen kontra ari dira lehiatzen. Bigarren fasean partida bakarra irabazi duten arren, Ganix Mironen neskek asteburu gehienetan ondo lehiatu dira; baina jokalariak faltan dituztenean, asko sufritzea tokatzen zaie.
Larunbatean 73-42 galdu zuten Tabirako Baque talde bizkaitarraren kontra. Partida hasi aurretik galduta zutela esan daiteke, zazpi jokalarirekin bidaiatu baitzuten hondarribiarrek. Hala ere, “neskek zuten guztia utzi zuten kantxan”, adierazi du entrenatzaile irundarrak. Bere hitzetan, denboraldia talde bezala bukatzea da azken hilerako erronka: “geratzen diren lau partida zail hauetan borrokatu, jokalariak berreskuratu eta talde bezala bukatu”.
Hurrengo partida etxean jokatuko du Ikasbasketek, larunbatean, 19:45ean. Megacalzados Ardoi izango da aurkaria. Zizurrekoak bigarren postuagatik ari dira borrokatzen.
Azken partidetan jokalariak berreskuratu eta talde bezala bukatu nahi dute
