Santiagotarrak-en emakumeen Senior Mailako ontzia Gipuzkoako Ontzi Luzeen Txapelketako irabazle izan da Orion jokatutako estropadan.
Santiagotarrak-en emakumeen zortzikoa, urrezko dominak soinean.
Larunbatean egin zen Orioko uretan Aulki Mugikorreko Gipuzkoako Ligako laugarren jaitsiera, eta aldi berean Gipuzkoako Ontzi Luzeen Txapelketa. Bertan, Oarso Bidasoko hainbat ontzi izan ziren lehian. Horietatik emaitzarik oparoena lortu zuena Santiagotarrak-BMren emakumeen zortzikoa (lemazainarekin) izan zen: irabazi egin zuten bere lehia, beraz, ligako estropada bere egiteaz gain, Ontzi Luzeen Gipuzkoako txapeldun izan ziren.
Euren kategorian Ur Kirolak izan zuten aurkari irundarrek, eta 43 segundo atzean utzi zituzten donostiarrak. Hala, ontzia osatu zutenak honakoak izan ziren: Ainhoa Zapirain, Amaiur Etxeberria, Jessica Berra, Elene Lopetegi, Irati Iñarra, Lorea Etxart, Ane Marcos eta Maider Grijalba. Lemazaina Elur Grijalba izan zen.
Hori bakarrik ez. Metal gehiago eraman zituzten Irunera Santiagotarrak-eko kideek. Hala, Haurren Mailako scull bikoitzean, Maitane Zapiain eta Ane Calvo urre izan ziren; beste urre bat, kasu honetan Kadete Mailako emakumeen scull bikoitzean (Naroa Zubimendik eta Helene Sagarzazuk osatua).
Gizonek zilarrezkoak lortu zituzten. Esaterako, Kadete Mailako gizonezkoen lauko scull-ean bigarren izan ziren Pablo Martinez, Julen Lasarte, Beñat Jimenez eta Gorka Ortiz. Haur Mailako lauko scull-ean ere zilarra lortu zuten bidasoarrek, Chembao Sanchezen, Pablo Martinezen, Ander Ibargoienen eta Xabi Etxebesteren lanari esker.
Beste taldeak
Santiagotarrak-ez gain, Hondarribia Arraun Elkarteko eta San Juan-Koxtapeko ontziak ere izan ziren Orion. Honakoak haiek lortu zituzten emaitza esanguratsuenak:
- Mutilen kadeteen zortzikoan, San Juan-Koxtape lehena eta Hondarribia A eta B bigarren eta hirugarren.
- Nesken lauko scullean, kadeteetan: Hondarribia irabazle.
- Haur Mailako mutilen laukoan: Santiagotarrak bigarren eta hirugarren Hondarribia.
- Gazte Mailan, nesketan eta biko ontzian, Hondarribia A eta B bi lehenak.
- Absolutuan, zortzikoan. Hondarribia bigarren Orioren atzetik.
