Hirugarren Asun Casasola Ipuin Lehiaketa hastear da

Hilaren 25tik aurrera ipuinak bidaltzeko epea irekiko dute. Aurtengo edizioan, berritasun bezala, gazteen kategoria sortu dute.

Imanol Saiz

Irun

2017/11/23

Irungo Brontë liburu dendan egin dute lehiaketaren aurkezpena.

Asun Casasola Ipuin Lehiaketaren edizio berria dagoeneko iritsi da. Hirugarrenez, indarkeria matxistarik gabeko jendartea irudikatzeko sortutako lehiaketa egingo dute, Nagore Laffagen erailketaren hamar urte betetzen direnean zehazki. “Lehiaketarekin bat egin nahi dugu amaren borrokarekin, bai berdintasunaren alde eta genero indarkeriaren kontra”, zehaztu dute antolatzaileek. Gaur aurkeztu dute lehiaketa antolatzaileek Irungo Brontë liburu dendan. Bertan, besteak beste, Eneritz Dueso, Joana Otxoteko, Nerea Sarriegi, Ylenia Benito, Oihana Llorente eta Miren Lantz izan dira. Lehiaketaren bigarren edizioko Nerea Sarriegiren ipuinaren irakurketarekin eman diote hasiera aurkezpen ekitaldiari. Ondoren, lehiaketaren xehetasunak azaldu dituzte. Zehaztu duten bezala, aurtengo lehiaketa “berezitasunekin” dator. Helduen kategoriaz gain, aurten, Gipuzkoako Foru Aldundiari esker, lehiaketa gazteengana hurbildu dute, haientzako kategoria berezia sortuz. Kategoria horretan 12-16 urte bitarte gaztetxoek hartuko dute parte. Hirugarren edizioari ‘Ez da ez’ leloarekin ekingo diote. Helburu bezala, beste behin, “berdintasunaren aldeko jendartea bultzatzea eta genero indarkeria baztertzea” dute. Horretarako, berdintasuna ildo nagusia izanik, ipuinak sortu eta bidaltzeko deialdia luzatu dute bidasoarren artean, euskaraz zein gaztelaniaz, hilaren 25etik aurrera. Gazteek 2018ko urtarrilaren 20ra arte eta helduek otsailaren 10era bitarte izango dute aukera ipuinak bidaltzeko. Martxoaren 8an emango dute irabazleen berri. Sariak Aurtengo sariak handitu egin dituzte. Helduen kategorian, euskaraz eta gaztelaniaz, irabazleek 400 euroko saria jasoko dute; gazteen kategorian berriz, irabazleei 150 euro eta 50 euroko txartela emango diete, dendan bertan liburuak erosi ahal izateko. Azken lau urteetan, antolatzaileek nabarmendu duten bezala, “500 altxor” baino gehiago batu dituzte, eta aurtengo edizioarekin berdintasunaren aldeko ipuin bilduma handitu nahi dute. Xehetasun gehiago jakin nahi izanez gero, lehiaketaren webgunean informazio guztia eskuragarri dago.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.