Mariano Peñaren hamar aginduak, Itsas Etxean

Moldaketa, harri gainean zizelkatutako testutik oso urruti geratzen den arren, Moisesek jaso zituen hamar aginduetan oinarritzen da 'Obra de Dios'.

Asier Perez-Karkamo

Hondarribia

2017/10/31

Biblian kontatzen direnak hankaz gora jarriko dituzte ostiralean

Obra de Dios antzezlana iritsiko da ostiralean Hondarribiko Itsas Etxea Auditoriumera, 20:00etan. New Yorken arrakasta handia izaten ari den obraren moldaketa da, 13 Emmy irabazita dagoen David Javerbaumek idatzitakoa. Gaztelaniazko bertsioa Maribi Arrietak idatzi du, eta Txalo eta Pentacion ekoiztetxeen arteko elkarlanaren fruitua da. Mariano Peña aktorea (Aida, Alli abajo, Los Serrano…) da Obra de Dios-en protagonista nagusia eta, era berean, historiako protagonista nagusienetako bat interpretatuko du obran, kristauen Jainkoa. Moldaketa, harri gainean zizelkatutako testutik oso urruti geratzen den arren, Moisesek jaso zituen hamar aginduetan oinarritzen da Obra de Dios. Hain zuzen ere, hamar agindu berri ematera jaitsiko dira Jainkoa eta bere goiaingeruak Itsas Etxera, eta gizateriak dituen galderak erantzutera. Adanen sorreraren benetako arrazoia zein den, Eva bekataria ote zen, zenbat animalia salbatu zituen Noek bere barkuan… horrelako galderei erantzungo diete, itun zahar nahiz berrian ageri dena hankaz gora jarriz. Sarreren prezioa 15 eurokoa da. Internetez eros daitezke, edo Arma Plazako turismo bulegoan ostegunera arte. Ostiralean, antzezpenaren egunean, Itsas Etxeko leihatilan jarriko dituzte salgai, emanaldia hasi baino bi ordu lehenago.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.