Ikasbasketek gertu izan du lehen garaipena, baina ihes egin dio
Lehen Mailako etxeko lehen partidan La Salle nagusitu zaio. Ganix Miron entrenatzaileak onartu du urduritasunez hasi dutela maila berrian.
Hondarribia Ikasbasket taldeak gertu izan du lehen garaipena maila berrian. Bilboko La Salleren kontra jokatu zuten larunbat arratsean Lehen Mailako etxeko estreinaldian eta, lau minuturen faltan hondarribiarrak aurretik zeuden arren (37-36), azken minutuetan bilbotarrak gehiago izan ziren, eta bi puntuek ihes egin zuten Hondartzatik.
Azken markagailuak (40-44) argi erakusten du ez zela partida erakargarriegia izan, baina kontuan izan behar da etxeko taldeak bi joko antolatzaileak falta zituela, eta gainontzekoek lan handia egin behar izan zutela hutsune hori betetzeko. Ganix Mironen neskak ezeroso aritu ziren, baloi asko galduz eta bateko jaurtiketetan ohikoak baino batezbesteko txarragoak eginez.
Entrenatzaileak urduri ikusten du taldea liga hasieran, baina oso argi dauka urteko helburua zein izan behar den: “Nahiko urduri ikusten dut ekipoa maila berrian, denbora beharko dugu joko maila hobetzeko. Gure helburua maila mantentzea da, eta horretarako maila badu taldeak”.
Hurrengo asteburuan Gasteizen jokatuko du Ikasbasketek, Araskiren kontra. Ez da partida erraza izango, orain arteko bi partidak irabazi baitituzte arabarrek. Nolanahi ere, garaipenaren bila bidaiatuko dute hondarribiarrek, Lehen Mailako aurreneko puntuen bila.
Ikasbasketeko aurtengo taldea, denboraldi aurreko entrenamendu batean
