Larunbatean Ama Guadalupekoa gailendu zen Orioko XXVII. Estropadetan eta etxera ekarri zuen V. Orioko Kanpina Bandera. Ligan bigarren jarri dira.
Hiru estropada behar izan ditu Hondarribiak ligako lehen bandera eskuratzeko
Bi igandetan bi bandera irabazita, Hondarribia eta Urdaibairekin lehiatzeko moduan dagoela erakutsi du Eusko Label Ligako hasieran Orioko traineruak. Oriotarren bigarren garaipena utzi du asteburuak, eta Hondarribia Arraun Elkartearen lehenengoa. Urdaibaik bigarren egin du bi estropadetan eta sailkapeneko buru jarraitzen du. Liga, erregularrenak irabazten du eta, momentuz, Bermeok hartu du aurrea, baina bi puntura du Ama Guadalupekoa eta hirura Orioko Mirotza. Laugarrena, Kaiku, hamar puntu galduta dagoenez, hasieran behintzat oilategian hiru oilar daudela dirudi.
Larunbatean hondarribiarrak gailendu ziren Orioko XXVII. Estropadetan eta etxera ekarri zuen V. Orioko Kanpina Bandera —19:31,76 irabazlearen denbora—. Bermeori hiru segundo eta erdi atera zizkioten berdeek. Lehen ziabogara aurretik iritsi zen Ama Guadalupekoa eta hurrengo hiru luzeetan tarteari eutsi zioten, dena emanda hori bai; bigarren maniobra hiru segundo atzetik egin zuten bizkaitarrek, eta hirugarren ziabogaren tartea bi segundokoa baino ez zen izan hondarribiarren alde. Zierbenak eman zen ezustekoa, hirugarren iritsi ziren helmugara, laugarren Kaiku, eta etxekoak, Orio bosgarren.
Igandean, Donostian, etxean egin ez zuena egin zuen Oriok, estropada gogor eta luze batean nagusitu ziren —21:00,84 izan zen oriotarren denbora—. Bigarren txandan lehiatu ziren oriotarrak baina ezin da esan hori abantaila izan zenik, Sestaon irabazi zutenean onenekin batera egin zutelako arrauna. Donostian estropada bikaina egin zuen Oriok, eta horri esker lortu dute bigarren garaipena. Irabazi ez dituzten beste bi estropadetan ez dira oso fin ibili, eta hori horrela, sailkapeneko hirugarren postuan daude, baina Hondarribitik puntu bakarrera.
Pasaitarren arteko berdinketa
Oarsoaldeko traineruei dagokionez, pasaitarren arteko parekotasuna utzi digu asteburuak. Maila eusteko helburuari begira, San Pedrok puntu asko pilatu ditu, Orion seigarren eta Donostian zazpigarren sailkatuta. San Juanek ez zuen bere egunik onena eduki larunbatean, eta bakarrik Astillerok baino hobe bogatu zuen; atzo, ordea, bosgarren postuan bukatu zuten sanjuandarrek, eta asteburua salbatzeko balio izan dio Donostiakoak.
Sailkapen nagusian 22 punturekin daude Pasaiako bi klubak, zazpigarren San Juan, zortzigarren San Pedro, eta puntu kopuru berberarekin dago Zierbena; bosgarrena bi puntura dute. Larunbatean a Coruñan bigarren tandan aterako dira pasaitarrak, baina Cabok eta Aresek euren uretan bogatu dute. Galizian beti meigak hartu behar dira kontuan.
Sailkapen nagusia
- Urdaibai. 44 puntu.
- Hondarribia. 42 puntu.
- Orio. 41 puntu.
- Kaiku. 34 puntu.
- Ondarroa. 24 puntu.
- Tiran. 23 puntu.
- San Juan. 22 puntu.
- San Pedro. 22 puntu.
- Zierbena. 22 puntu.
- Cabo. 18 puntu.
- Ares. 16 puntu.
- Astillero. 4 puntu.
