[Galeria] Eguraldiak ez du Baserritarren Eguna zapuztu

Gaur, San Pedro eta San Martzial jaien azken egunean, Baserritarren Eguna egin dute Irunen.

2017/07/01

Eguraldia lagun ez izan arren, jende mordoa gerturatu da Urdanibia plazara.

Gaur, San Pedro eta San Martzial jaien azken egunean, Baserritarren Eguna egin dute Irunen. Urdanibia plazan hainbat postu ipini dituzte, baserritarren produktu eta ohiko ganadu erakusketarekin. Euri zaparrada erori arren, jendetza elkartu da Mosku inguruan. Eguna goiz hasi dute Urdanibia plazan. 8:00etan, klasikoa den ganadu lehiaketa egin dute, Irungo Eskola Kirolak elkartearen eskutik. Bertan, inguruko baserritarren behi onenek epaimahaiaren iritzia jaso dute, aurtengo onena aukeratzeko. Luze jo du lehiaketak. Ondoren, 10:00etan, Urdanibia plaza ingurutik trikitilariak aritu dira, goiza girotzen. 11:30ean, Angel Mari Peña Garikano, Julio Soto, Aitor Mendiluze eta Sustrai Colina bertsolariek bertso saioa eskaini dute. Bertso erakustaldia bukatu bezain laster, herri kirolen ikuskizunaren txanda izan da. Euskal Herriko harri jasotzaile eta aizkolari onenak lehiatu dira euri tanta artean. Arratsalderako ere zenbait ekitaldi antolatu dituzte. 18:00etan, Kurpil Kirolak antolatutako profesionalen esku pilota jaialdia egingo dute Uranzu frontoian. Aldi berean, Urdanibia plazan, Adixkideak dantza taldearen eskutik, Bidasoko XXVII. dantza suelto txapelketa eta erromeria egingo dute. Aurtengo San Pedro eta San Martzial jaiak bukatzeko ordu gutxi falta dira. Bederatzi egunez, irundarrek 140 ekitaldi baino gehiagoz gozatu dute. Jada Irunen, datorren urteko sanmartzialetan pentsatzen ari dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.