Gaurik motzena, baina magikoenetakoa

Dozenaka sutzar piztuko dira San Joan bezperan Hondarribian, gehienak baserri-eremuan. Kai Zaharreko ekitaldia 20:15ean hasiko da.

Asier Perez-Karkamo

Hondarribia

2017/06/22

Hondarribiko haurrak, iaz, Kai Zaharreko hondartza txikian

Ametsak betetzen ote diren, gaizki egindako azterketak erretzeak zerbaiterako balio ote duen, biharamunean ihintza hostoak zapaltzeak mesede egingo ote digun, hori zalantzazkoa izan daiteke. Baina San Joan gaua magikoa dela, hori ukaezina da. Dozenaka su piztuko dira bihar Hondarribian, herria laino artean biltzeraino. Su gehienak baserri-eremuan piztuko dituzte, baina jende gehien biltzen duena Kai Zaharrekoa izaten da, Udaleko Kultura departamentuak eta Hondarribia Arraun Elkarteak elkarrekin antolatzen dutena. 20:15ean hasiko da ekitaldia, baina aurretik musika banda herrian barrena ibiliko da San Joan zortzikoa jotzen. Sua da biharko protagonista nagusia, baina ez bakarra, arraun elkarteak herriko traineruen aurkezpena egiteko baliatzen baitu ekainaren 23a. Aurten, tamalez, iaz baino eskifaia bat gutxiago aurkeztuko dute, nesken ontzia osatzerik ez dutelako izan. Hortaz, mutilen A eta B traineruetan bogatuko duten arraunlariak elkartuko dira Bentako aparkalekuan, hurrenez hurren, Eusko Label Ligan eta KAE1ean lehiatuko direnak. Ondoren, ohi bezala, Meakako dantzarien saioa izango da, sua piztu aurretik. Horren zain egon gabe, ikasleek sutzarrez beteko dituzte bi hondartza txikiak, eskolako apunteak, itzulitako amodiozko gutunak, eta ahaztu nahi dituzten beste kontu batzuk erretzeko. Su garrak ahultzen direnean zezensuzkoak emango dio amaiera Kai Zaharreko ekitaldiari. Udalak bandoa kaleratu du, oro har, biharko egunean zentzutasuna eskatzeko. Izan ere, magikoa izaten da San Joan bezpera, baina are magikoagoa sustorik gabe igarotzen bada. Kontuz bada suarekin, eta etxeko leihoak ondo itxi, izpiritu zaharrak uxatzea baita kontua, ez etxera sartzea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Gaurik motzena, baina magikoenetakoa

Gipuzkoa

Harun Farockiren begirada zorrotza

Itxasok uste du beharrezkoa dela etxebizitza eskaintza handitzea tentsio eremuetako egoerari aurre egiteko

Coltrane eta Davis, 1926an jaiotako izarrak

Donostiako Karmengo jaietan jasandako «jazarpen poliziala» salatu dute dozenaka herritarrek

Jon Sarasua euskaltzain oso izateko hautagai izendatu dute

Donostiako Piratek bertan behera utzi dituzte abuztuaren 14ko kontzertuak

Memoria historikoari begiratzeko bi proposamen bateragarri egin dituzte Carla Filipek eta Taxio Ardanazek

Uholdeak gertatu aurretik abisu emateko sistema bat sortu dute Pasai Donibanen

Hernani eta Irun lotzen dituen Renfeko tren zerbitzua etengo dute uztailaren 25etik irailaren 6ra

Bergarako eta Zarauzko autoen ikuskapen zentroetan greba mugagabeari eutsiko diote

Beasaingo Urkiola jatetxeak irabazi du Jakitea elkartearen Juan Manuel Garmendia gastronomia saria

Torreko Hodia ikusgai jarriko dute Ekainberrin, duela 12.000 urte grabatutako pieza bat