Juanma Garatek txirrindularitzaren inguruko asteburu osoko egitaraua antolatu du. Gaur, Sport Mundi eta Juneren Hegoak elkarteekin elkarlanean, bizikleta saio solidarioa egingo dute.
![](http://bidasoa.hitza.eus/site/files/2017/06/DSC_0217.jpg)
Spinning martxa solidarioa egingo dute 17:30etatik aurrera.
Gaur arratsaldean Bizikleta Festa egingo dute Irungo San Juan plazan. Juanma Garate Cannondale taldeko zuzendariak txirrindularitzaren inguruko asteburu osoko egitaraua antolatu du. Gaur, Sport Mundi eta Juneren Hegoak elkarteekin elkarlanean, bizikleta saio solidarioa egingo dute.
Spinning modalitateko hamarnaka bizikleta ipini dituzte udaletxe parean. 17:30etatik aurrera, irundarrak bizikletan igoko dira, gaixotasun arraroak pairatzen dituzten haurrei laguntzen dien Juneren Hegoak elkarteari bultzada emateko. Bizikleta horietan zirkuitu birtual bat egingo dute txirrindulariek belodromo baten inguruan. Belodromo horri emandako buelta bakoitzagatik, euro bateko laguntza jasoko du fundazioak. Gainera, erabilitako hainbat bizikleta zozketatuko dituzte partaide eta ikusleen artean. Lortutako diru guztia Juneren Hegoak elkarteari bideratuko zaio.
Biharko,
Juanma Garate VIII. Zikloturista martxa egingo dute Irunen. 132 kilometroko ibilbidea egin beharko dute txirrindulariek. 8:00etan abiatuko dira bizikleta gainean San Juan plazatik.
Azken urteetako ibilbidea mantenduko du: Irundik Nafarroa aldera N-121 errepidetik joan, herrialde hartatik ibilbidearen zatirik handiena egin, eta Irunera bueltan, azken 50 kilometroetan, hiru mendate: Agina, Aritxulegi eta Ingelesen Gaztelua. San Juan plazan dute helmuga txirrindulariek, 12:30etik 14:30erako tartean.