Emeek Emana erakusketa, Irunen

Erakusketa 1936ko gerra eta frankismoa jasan zuten emakumeen irudi eta testigantzekin dago osatua. Hilaren 23ra arte dago zabalik, Oiasson.

Urko Etxebeste

Irun

2017/06/05

Emeek Emana gaur aurkeztu dute.

Oiasso Museoak Emeek Emana erakusketa jasoko du hilaren 6tik (19:00etan irekiko dute) 23ra arte. Erakusketa ibiltaria da, emakumeen 63 erretratuk osatua, eta emakumeen testigantzekin eta memoria historikoa oinarri duen egitasmo zabalago baten zati da. 1936ko gerra eta frankismoa azalean sufritu zuten emakumeenak dira erretratuak eta testigantzak. Horregatik, irudiez gain, ikus-entzunezkoak izango dira protagonista erakusketaren barruan. Erretratuez gain, horien protagonista diren emakumeen testigantzak ikusi eta entzuteko aukera dago bertan. Horien artean dago Angelita Rodriguez Fernandez irundarra. Gaur aurkeztu dute iniziatiba Sergio Corchon Irungo Udaleko Ongizate ordezkariak, Julia Monge Intxorta 1937 Kultur Elkarteko kideak, eta Mauro Saravia argazkilariak. Corchonek adierazi du erakusketa Irunen egotearen arrazoia dela udalaren eta Intxorta 1937ren arteko elkarlana, “emakumeen lana duela ez hainbesteko garai batean zer nolakoa izan zen, eta horren gaineko gogoetako egiteko baliagarri den erakusketa da”. Erakusketaren barruko ekitaldien artean, hitzaldia egingo dute hilaren 21ean, Oiasson bertan. Mertxe Tranchek Irungo emakumeak eta memoria historikoa izenburupean solasaldia emango du. Mostra bisitatzeko ordutegia, honakoa: asteartetik larunbatera 10:00etatik 20:00etara, eta igandetan 10:00etatik 14:00etara.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.