170 erakusketaritik gora Bioterra azoka ekologikoan

Ekaineko lehen asteburuan, hamalaugarren aldiz, Bioterra azoka ekologikoa egingo dute Ficoban.

2017/05/24

Haurrek ere euren txokoa izango dute aurtengo Bioterran.

Ekaineko lehen asteburuan, hamalaugarren aldiz, Bioterra azoka ekologikoa egingo dute. Elikagai ekologikoen, bioeraikuntzaren, energia berriztagarrien eta kontsumo arduratsuaren azoka Ficoban izango da, bizimodu ekologiko eta ekonomia berdea irundarren artean sustatzeko. Ekainaren 2tik 4ra irekiko dute azoka, 10:00etatik 20:00etara. 170 erakusketari baino gehiago izango dira hurrengo asteburuan Ficoban eta 70 jarduera baino gehiago eskainiko dituzte. Hiru gune handitan banatu dute azoka: Bioterra gunea (nekazaritza, kosmetika eta ekoturismoko enpresek hartuko dute parte bertan), Naturall gunea (Osasunaren eta ongizatearen gunea) eta Geobat gunea (geobiologiako, bioeraikuntzako, energia berriztagarrien eta kudeaketa ekologikoko erakusketariak izango dira bertan). Frantziatik eta Espainiako Estatutik etorriko dira erakusketariak aurten. Bioterra Yoga Day da aurtengo azokak eskainiko duen berritasunetako bat. Kanpoaldeko erakusketa-gunean master class bat eskainiko dute. Gainera, asteburuan zehar, adituen hitzaldiak antolatu dituzte. Aurtengo azokak, kosmetika ekologikoaren inguruko Biobeauty Gunea izango du. Iazko Bioterrazaren arrakasta ikusita, aurten ere kanpoan gune gastronomikoa ipiniko dute. Etxeko txikienek ere euren txokoa izango dute azoka ekologikoan. Elikadura osasuntsuari eta produktu ekologikoei buruzko antzezlanaz gozatzeko aukera izango dute haurrek, Euskadiko Nekazaritza eta Elikadura Ekologikoko Kontseiluaren eskutik. Gainera, txikiei zuzendua ere, baratzezaintzaren inguruko tailer bat antolatu dute, goizez eta arratsaldez. Bisitarien artean garraio publikoaren erabilera sustatzeko nahiarekin, Euskotren-ekin Bioterra azokara joateko txartel bereziak ateratzeko akordio batera iritsi dira. Asteburuan zehar, Bioterrak, orduro, produktu ekologikoen sorta bat zozketatuko du, 125 euroko erosketa-kupoia eta Diametro 200 jatetxean bazkaltzeko eguneko menuko 20 bonuen zozketaz gain. Azokara sartzeko sarrerak 3 euroko prezioa du. 12 urte beherako haurrek doan sartzeko aukera izango dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.