Puntuari esker salbazio postuetan jarraitzen dute hondarribiarrek. Zazpi partida daramatzate galdu gabe.
86 minutuan lortu zuen binako berdinketa etxeko taldeak (arg: @hondarribiafe)
Beste partida bat galdu gabe, zazpigarrena jarraian. Hondarribia FE-k Aretxabaletaren kontra berdindu zuen larunbatean (2-2) Hondartza futbol zelaian. Aurkarien artean Aloña Mendik soilik huts egin zuen eta bost talderen artean erabakiko da jaitsierako laugarren tokia.
Aukera gehienak hondarribiarrek sortuz zituzten arren, aretxabaletarrak bi aldiz aurreratu ziren markagailuan. Baina azkenean berdinketa lortu zuten etxekoek, partida amaitzeko bost minutu falta zirela. Eta urrea balio dezakeen puntua eskuratu zuen Hondarribia FE-k, kontuan izanik aurkaria sailkapeneko hirugarren tokian dagoela.
Atzekoen artean, Beti Gaztek garaipena lortu zuen eta puntu bakarrera jarri da. Elgoibarrek, bere aldetik, Mutrikun berdindu zuen eta borrokan tinko segitzen du. Aloña Mendik, aldiz, Hernanik galdu zuen eta mailari eusteko aukera asko galdu ditu.
Liga amaitzeko hiru jardunaldi geratzen direnean, Martutene eta Ostadar dagoeneko jaitsita daude, eta Aloña Mendik miraria beharko luke. Jaitsierako laugarren posturako bost hautagai daude hiru puntuko aldearekin: Vasconia eta Touring (39), Hondarribia (37), eta Beti Gazte eta Elgoibar (36). Zertxobait lasaiago Zarautz eta Amaikak Bat daude (40 puntu), baina ezin dira lokartu.