Plaiaundiko zelaiaren fumigazioagatik, kezka
Atzo, osteguna, Plaiaundi kirol eremuko zelaia fumigatu zuten. Bidasoaldeko Lagunak taldeak horren gaineko azalpenak eskatu ditu.
Bidasoaldeko Lagunak taldeak kezka agertu du atzo (hilak 20) Plaiaundi eremuko zelaia, errugbi joko eremu bezala erabiltzen dena, fumigatzen aritu zirelako. Taldearen kezka da ea zein produktu erabili ziren fumigazioa egiteko, eta fumigazioa egiteko zein irizpide erabili diren galdetu nahi izan diote hori egin dutenei.
Izan ere, taldeak zehaztu du, zelaia erabiltzen ez denean, hegaztien atsedenerako eta elikatzeko leku bihurtzen dela eremu hori, eta intoxikazioak gerta daitezkeela hegaztien artean praktika txarrengatik. Gainera, taldeak nabarmendu du migrazio garaian daudela hegaztiak.
Fumigazioa egiten ari ziren beharginak goitik behera babestuta egoteak areagotu egin du Bidasoaldeko Lagunen kezka, “horrek esan nahi du ez zirela lanean ari kalterik egitez ez duen sustantzia batekin”.
Alta, taldeak oroitarazi du Natura 200 sarearen barruan dagoela Txingudiko badiako eremu hori, eta besteak beste, desagertzeko zorian dauden hegazti espezieak izaten direla bertan. “Osagai kimikoen erabilera legez araututa dago, eta horien erabilera ez justifikatua delitu izan daiteke”.
Langileak, zelaia fumigatzen. Argazkia: Bidasoaldeko Lagunak.
