Datorren igandean, hilak 23, Gipuzkoako Nazioarteko Txakur Erakusketa izango da Irungo Ficoban.
Ficoban izango da igandean aurtengo Gipuzkoako Nazioarteko Zakur Erakusketa.
Datorren igandean, hilak 23, Gipuzkoako Nazioarteko XXXVIII. Zakur Erakusketa izango da Irungo Ficoban. Estatu eta nazioarteko sariketa nagusia da eta bertan kalean oso ohikoak ez diren ehunka zakur ikusteko aukera eskainiko dute, lehiaketa batean parte hartzeaz gain. Aurtengo erakusketan 700 zakur baino gehiagok hartuko dute parte.
Erakusketarako hamasei stand jarriko dituzte eta zakurrentzako askotariko produktuak ezagutzeko aukera izango da, kosmetika, lurrinak, arropa, janaria edo osagarriak erosteko aukera izateaz gain. 9:30ean emango diote hasiera erakusketari. Orduan, 19:00ak bitarte iraungo duen lehiaketa hasiko da. Lehiaketan arraza bakoitzeko alerik onena aukeratuko dute. Espainiako Txapelketarako Gaitasun Agiria eta Nazioarteko Gaitasun Agiria izango dira egunean zehar banatuko diren beste bi sari interesgarriak. 16:00etan hasiko diren finaletan, arraza bakoitzeko alerik onenak igoko dira Ohorezko Ringera, talde bakoitzeko onena izendatzeko eta geroago, denen artean, Erakusketako Txakurrik Onena titulua eta Errege Kopa zeinek eramango duen erabakitzeko. Epagneul bretoia eta leonberger arrazako txakurrentzat ere sari berezia prestatu dute. Sari horietaz gain, Bikoterik Onena, Hazkuntza Talderik Onena, Beteranorik Onena, Gazte Promesik Onena, Txakurkumerik Onena eta Espainiako Arrazarik Onena sariak banatuko dituzte.
Aurtengo lehiaketarako Eslovenia, Espainia, Finlandia, Frantzia, Irlanda eta Poloniatik etorriko dira epaileak. Erakusketaren sarrera bost eurokoa izango da helduentzat, eta 10 urtetik beherakoentzat berriz, hiru eurokoa. Debekatua dago egunean bertan lehiaketa eta erakusketan parte hartuko ez duen zakurrik sartzea.
[Eguneko programa]:
- 08:00etan: dokumentazioa hartzea eta albaitari kontrola.
- 09:30ean: epaiketen hasiera.
- 12:00etan: heziketa zibila, Alvaro Morenoren zakur-hezitzailearen eskutik.
- 13:00etan: baieztapenak eta TAA.
- 14:00etan: aurkezle gazteen lehiaketa.
- 16:00etan: taldeko finalen hasiera eta final handia.
