Hondarribia FE-k autobusa jarri du igandean Oñatira joateko
14:30ean aterako da autobusa Miramarretik. Ez jaisteko borrokan hondarribiarren aurkari zuzena da Aloña Mendi.
Hondarribia Futbol Elkarteak autobusa antolatu du Ohorezko Mailako taldeak igandean jokatuko duen partidara joateko. Aurreko larunbatean liderrari irabazi eta gero, aurkari zuzen baten kontra ariko da Hondarribia FE, Aloña Mendirekin, Oñatiko Azkoagain futbol zelaian, 16:30ean.
Autobusa 14:30ean abiatuko da Miramarretik eta joan nahi duenak honako telefono zenbakira deitu behar du: 689 70 31 28. Gainera, Oñatiko partidara joaten direnek, Hondartzako hurrengo lehian edari bat doan izango dute elkartearen tabernan.
Une honetan hondarribiarrek lau puntu azpitik dute Aloña Mendi. Hortaz, berdinketa ez litzateke emaitza txarra, baina liga amaitzeko oraindik asko geratzen denez eta borrokan beste talde batzuk sartuta daudenez, hiru puntuen bila aterako da Hondarribia FE (ikusi sailkapena). Kanpoan jokatuko dute berdeek, baina ez zaie zaleen berotasunik faltako.
Gol gutxien sartzen duen taldea da Oñatikoa, baina defentsan asko presionatzen duena
Erlazionatutako edukiaHondarribia FE-k 4-1 irabazi dio lider Anaitasunari
