Aurten ere izango da belaunaldien arteko gastronomia proba olinpikoa

Bi aroetako taldeek parte har dezakete. Apirilaren 8an egingo dute gastronomia proba eta hilaren 30era arte eman dezakete izena, taldekide kopurua zehaztuz.

Asier Perez-Karkamo

Hondarribia

2017/03/23

Garai bateko Ur karusa taldea eta egungo Ur karruxa, iazko paella proban

Iazko paella egun arrakastatsuaren ondoren, berriro egingo dute, berriro elkartuko dira garai bateko eta egungo talde olinpikoak. Apirilaren 8an egingo dute IV. Herri Olinpiadetarako puntuagarria izango den gastronomia proba, arratsaldez, Portuan. Belaunaldien arteko afari-mendaria izango da, 18:00etan hasita Arrantzale Auzoan egingo dena. Izena ematen duten taldeek gehienez 5 euroko gastua izango duen plater bat aurkeztu beharko dute, antolatzaileek erabakitako osagai komun batekin —aurrerago zehaztuko dute zein—. Iazko paella egunean bezala, garai bateko eta egungo taldeek parte hartu dezakete, baina aro berriko olinpiadetan aritu diren eta orain ari ez direnak ere. Adi, izena emateko epea hilaren 30ean bukatzen dela. Posta elektronikoz egin behar da herri olinpiaden helbidera idatziz, eta taldekide kopurua zehaztu behar da mezu horretan. Kontuan hartu behar da horrelako proba bat antolatzea ez dela batere erraza, eta egun horretarako jakin behar dute zenbat jendearentzako tokia prestatu behar den. Probaren ondoren, talde bakoitzak bere afaria prestatu beharko du, eta hori ja ez da puntuagarria izango. Antolatzaileek gaineratu dutenez, “saiatuko gera ere hurbiltzen den beste jendearentzat ere pintxo batzuk edo banatzen, giroa sortzeko”. Etzidamu, mendi proba Igande honetan mendi proba egingo dute, 2017ko olinpiadetako laugarrena. 11:30ean abiatuko dira Zumardiko kioskotik —ez Gernikako arbolatik, hor Talaia lasterketaren helmuga ezarri dute— , eta Santiagotxotik igoko dira Guadalupe aldera. Gorako bidean probaren bat egin beharko dute taldeek, gainontzekoak goian, bazkaldu eta gero. Garai bateko jokoak izango dira protagonista, toka, soka-tira, eta, antolatzaileek jakinarazi dutenez, “jokoren bat talde ezberdinak elkarrekin lehiatzen egingo da”.

Bisitatu olinpiadetako webgune berezia

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.