Bigarrenak hirugarrenari irabazi dio partida borrokatu batean (55-60). Getxoztarrek maila handia erakutsi dute eta Ikasbasket ez da eroso egon.
Ikasbasketek zailtasun handiak izan zituen getxoztarren defentsa gainditzeko
Abisatu genuen
prebian. Oraingo Getxok ez du zerikusirik lehen itzulian etxean Ikasbasketen kontra 23 puntugatik galdu zuen taldearekin. Hamar partida jarraian irabazita iritsi zen Hondartzara, eta 11.a lortu zuen larunbatean Express Hondarribia Ikasbasket taldeari irabazita (55-60).
Bizkaitarrek oso partida serioa egin zuten defentsan, eta lehen segundotik arnasarik gabe utzi zituzten hondarribiarrak, jaurtiketetan bataz besteko txarrak eraginez. Horrela, markagailuan aurrea hartu zuten bisitariek eta Ikasbasketek esfortzu handia egin behar izan zuen partidari eusteko. Hondarribiko taldea ez beste arratsalde batzuetakoa eta atsedenaldira zortzi puntuko aldearekin iritsi zen aurretik Getxo (24-32).
Hirugarren laurdena oso parekatua izan zen, eta puntu gutxikoa. Defentsak erasoak baino gehiago izan ziren eta talde bakoitzak 12na puntu lortu zituen.
Hala, azken laurdenera zortzi puntuko aldearekin iritsi zen Getxo, eta lehen bi minututan hamabira jarri ziren. Hondarribiarren entrenatzaileak hutsartea eskatu zuen eta, orduan bai, benetako Ikasbasket azaldu zen, goian presionatzen aurkaria itotzeko gai den talde hori. 12-2ko partzialarekin bi puntura jarri zen taldea, baina bizkaitarrek saskiratze erabaki pare bat lortu zituzten, eta garaipena beraientzat izan zen.
Etxekoei dagokienez, Cristina Gonzalez izan zen onena erasoan, 15 punturekin; Izaro Alzak 11 lortu zituen.
Azken fasea helburu
Zuzenean igotzeko taldea duela erakutsi zuen Getxok larunbatean, eta Logroñoko San Ignaciorekin lehiatuko da helburu horrekin.
Hondarribiak, bere aldetik, ia ezinezkoa izango du azken fasea etxean jokatzeko aukera ematen duen bigarren postua lortzea, baina lauko finala jokatzeko aukera asko ditu. Hurrengo partidetan, hori bermatu, batetik, eta jokalariak ahalik eta sasoikoen iristea, bestetik, izango da Express Hondarribia Ikasbasket taldearen helburua.
Bi urtetan bi aldiz maila igotzea ez dago edozeinen esku, baina hondarribiarrek erakutsi dute hori lortzeko grina behintzat badutela.
