'Lan gaua' egingo dute Hondarribian, kontrabandisten bidetik
Apirilaren 1ean lan gaua egiten zuten hondarribiarren bidea errepikatuko dute, gauez. Kontrabandista ohi batek gidatuko du ibilbidea.
Kontrabandisten ibilbide gidatua egingo dute apirilaren 1ean Hondarribian. Gauez egingo dute, garai batean bezala, hori baita 1970ko hamarkada arte eskualdean oso ohikoa zen gau lana ezagutzeko modurik onena. Hiru bat orduko ibilbidea egingo dute eta kontrabandista ohi bat ariko da gidari lanak egiten.
Bidasoako Kontrabandistak elkarteak antolatu du Lan Gaua, eta Hondarribiko Udalaren laguntza izango du. Bosgarren urtez egingo dute; aurreko ekitaldietan, Oiartzunen (bitan), Etxalarren eta Erratzun izan dute kontrabandisten ibilbideak ezagutzeko aukera.
Apirilaren 1ean 19:30ean jarri dute hitzordua Hondarribiko udaletxeko arkupeetan eta hor akreditazioak banatuko dituzte, eta azalpenak eman. 20:00etan hasiko da ibilbidea, gutxi gorabehera hiru ordukoa.
Izena eman nahi duenak posta elektronikoz egin behar du, aurretik. Hondarribiarrek 3 euro ordaindu behar dituzte eta gainontzekoek 7 euro. Zalantzaren bat duenak, 948 45 00 14 telefono zenbakira dei dezake. Bestela, Bidasoako Kontrabandistak elkartearen webgunean elkarteari eta Bidasoan egiten zen lanari buruzko informazioa aurkituko du.
Kontrabandoaren gaineko ibilbide bat, Ezagutu Zure Hiria programakoa
Irakurri Kontrabandisten bidean erreportajea
