Ostatu batera eraman dute banketxeak etxe gabe utzi duen emakumea
Gizarte zerbitzuetatik soluzioa bilatzen duten bitartean, Irunen biziko da. Banco Popularrak goizeko hamarretan hartu dizkio etxeko giltzak.
Irunen dago gaur goizean etxerik gabe geratu den emakume hondarribiarra. Ostatu batean hartuko du arnasa, Hondarribiko Gizarte Zerbitzuek harentzako soluzio bat bilatzen duten bitartean. Goizeko hamarretan zeukan hitzordua epaitegian Banco Popularreko abokatuarekin, bere etxeko giltzak emateko. Hondarribiko Udalak HITZAri baieztatu dionez, Juan Mari Altuna alkateordeak lagunduta joan da emakumea epaitegira.
Emakumearen egoera kontuan izanik ez da mobilizaziorik deitu. Izan ere, azken hilabeteetan etxetresna elektriko guztiak salduak zituen eta ur berorik gabe bizi zen, bizi baldintza oso kaxkarretan. Irungo ostatu batean egongo da, udalak Amuten duen emergentziazko pisua harentzat prestatu bitartean. Han biziko da behin-behinekoz, “alokairuzko pisu egokia” aurkitzen dioten arte.
Nonbait, gizarte zerbitzuetatik aspaldi ari zaizkio emakumeari laguntzen, baina, bistan denez, informazio transmisioak huts egin du. Beste behin argi geratu da banketxeak ez direla betetzen ari etxe kaleratzeak ekiditeko hartutako konpromisoak, eta Stop Kaleratzeak plataformak kasuaren larritasunaren berri izan duenerako, beranduegi izan da egoera iraultzeko.
Balio dezala gaurkoak dagokienek behar diren neurriak hartu ditzaten, Mendeluko Josu Langilea kaleko etxe kaleratzea herriko azkena izan dadin.
Mendeluko Josu Langilea kalean izan da etxe kaleratzea
