Erabakitzeko emakume gehiago eskatu ditu Udalak
Udalgintzan, sindikatuetan, elkarteetan eta, oro har, gizartean, erabakiak hartzeko guneetan emakume kopurua handitzea behar dela deritzote.
Erabakitzeko organoetan emakume eta gizonen ordezkaritza orekatua eskatu du Hondarribiko Udalak, martxoaren 8aren harira onartutako adierazpen instituzionalaren bitartez. Eudelek proposatutako testua onartu dute eta, bertan, udalgintzan, sindikatuetan, elkarteetan eta, oro har, gizarteko arlo desberdinetan, erabakiak hartzeko guneetan, emakumearen presentzia handitzea beharrezkotzat jotzen da.
Udalean ordezkaritza duten alderdi guztiek (EAJ, Abotsanitz, EH Bildu, PSE-EE eta PP), bat egin dute Eudelen adierazpenarekin eta zortzi printzipioren alde borrokatzeko konpromisoa hartu dute.
Honakoak dira onartutako zortzi puntuak:
- Kontsultarako eta erabakiak hartzeko organoetan emakume eta gizonen ordezkaritza orekatua eta tokiko edozein organotarako izendapenak bermatzea, betiere, sexu batek ere ez dezan izan %40tik beherako ordezkaritza (emakumeen parte-hartzea sustatzeko egitura espezifikoetan izan ezik).
- Zenbait mekanismo ezartzea, hautatutako emakume ordezkariak eskumen banaketa edo funtzio-esleipen estereotipatuen edo bestelako diskriminazio- edo jazarpen-moduen eraginpean izatea eragozteko.
- Parte-hartzea eta bizitza pertsonal eta familiarra uztartzea ahalbidetzen duten neurriak hartzea, ordutegien eta lan-metodoen eta herritarrei laguntzeko sistemen bidez.
- Sexuaren arabera bereizitako estatistikak jaso, bideratu eta publiko egitea, itxura sistematikoa emateko, tokiko esparruan emakumeen parte-hartzearen bilakaeraren jarraipena egin eta analisi horren araberako neurri zuzentzaileak ezartzeko.
- Emakumeen parte-hartzea indartuko duten espazioak eta sareak sendotzea, hala nola, emakumeen etxeak, jabekuntza eskolak eta/edo udal berdintasuneko kontseiluak, eta, besteak beste, emakume hautetsientzako Virginia Woolf Basqueskola jabekuntza-eskolako programan parte har dezaten ahalbidetzea.
- Udalerriko emakumeen ahalduntzea eta parte-hartze soziopolitikoaren sustapena ahalbidetzen duten ekintza espezifikoak ezartzea modu inklusiboan, batez ere, gutxiengoen taldeko kideak diren emakumeei dagokienez.
- Udalerrian gauzatzen diren parte-hartze prozesuek genero ikuspegia kontuan hartzen dutela bermatzea.
- Udaletako berdintasun sailetan eta gainerako udal sailetan neurri horiek gauzatu ahal izateko baliabide nahikoak jartzea.
Bizkaiko sei hautetsi Eudelen adierazpena irakurtzen, Gernikan
