Organikoen birziklatze tasa nabarmen igo da, batez ere jatetxe, jangela eta supermerkatuetan jasotakoa handitu delako, Txinzerren arabera.
Edukiontzi marroia irekitzeko sistema berria, txartel bidez. Apirilean jarriko dute indarrean.
2015ean %43,59, eta 2016an %46,61. Horiek azken bi urteetan Bidasoko hondakinen birziklatze datuak, Txingudiko Zerbitzuak (Txinzer) erakundeak emanak. Hau da, 2016an %3 hazi da birziklatze tasa Irunen eta Hondarribian puntu portzentualetan. Gainera, Txinzerrek esan duenez, zabortegietara %1,5 hondakin gutxiago eraman dute Txinzerren barruko udalek. “Europako Batasunak %50eko birziklatze helburua jarrita du 2010rako. Gero eta hurbilago gaude”.
Zehaztasunak. Txinzerrek iazko birziklatze tasaren igoeraren arrazoi nagusitzat hondakin organikoetan jarri du. Hala, kaleko edukiontzietan (marroietan) %10 organiko gehiago jaso dela adierazi du, baina arlo horretan igoerarik nabarmenena supermerkatuetan nahiz jatetxe eta jangeletan eman dela azaldu du, %94 hazi baita edukiontzi marroian jasotzen ez diren organiko horien birziklatze kopurua. Laburtuz, iaz 1.864.000 kilo organiko jaso zituzten Irunen eta Hondarribian, eta horietatik 540.000 kilo jatetxe, jangela eta supermerkatuetan sortu eta jasotakoak izan ziren, ia %33. Hala, orotara, 2016ko organikoaren birziklatze tasa %25 hazi zen.
Organikoen tasen gaineko gogoeta egin du Leire Zubiturrek, Txinzerreko kudeatzaileak: “Edukiontzietan jasotzen den organikoa %10 haztea emaitza ona da. Baina ziur gaude zenbaki hori askogatik hobe daitekeela. Badakigu oraindik bereizten ez den organikoaren bolumen handiago bat badagoela”.
Apiriletik aurrera itxitura elektronikoa duten edukiontzi marroiak jarriko dituzte eskualdean. Gainera, hondakin organiko sortzaile handiei jarraipen berezia egingo die Txinzerrek, eta gainera, hobariak izango dituzte tasan organikoa bereizten dutenek, “neurri horiekin espero dugu 2017an organikoaren bilketa nabarmen handitzea, Europako helburuetara iritsi ahal izateko”.
Beste frakzioak
Hona, labur, beste frakzioen bilakaera:
- Beira: kaleko igluetan %2,5 hazi da bilketa, eta ostalaritzako establezimenduetan atez ate egiten dutena %10.
- Ontziak: %8 hazi da bilketa.
- Oihalak/arropa: %2,3 hazi da bilketa.
- Pilak: %3,3 jaitsi da bilketa.
- Papera: %0,28 jaitsi da bilketa.
- Etxeko olio erabilia: %0,25 jaitsi da bilketa.
- Etxeko tresna elektrikoak (Garbigunean): %20 hazi da bilketa.
- Etxeko gai arriskutsuak (Garbigunean): %13 hazi da bilketa.
